Presidentja e Kosovës, Atifete Jahjaga thotë se nuk ka ardhur ende momenti që të zbulohet e vërteta e caktimit të saj në krye të presidencës, duke shtuar se “ndoshta për dikë do të jetë befasuese, e për dikë tjetër jo”.
Në një intervistë të gjatë dhënë për gazetarin Alban Dudushi në Top Channel, Jahjaga ka shpjeguar vizitën e saj të parë zyrtare në Shqipëri, duke nënvizuar pritjen e ngrohtë që ka gjetur nga autoritetet dhe synimin që kjo vizitë të shërbejë për forcimin e bashkëpunimit ekonomik, pasi si shprehet, “marrëdhëniet mes dy vendeve tona janë të tilla, që shkojnë përtej këtij kuptimi tradicional të shteteve”.
E pyetur për zgjedhjen e saj presidente e Kosovës, Jahjaga tha se ende nuk ka ardhur koha që të zbulohen rrethanat “misterioze” që e ngjitën atë në krye të shtetit.
“Ende nuk ka ardhur koha, por një ditë do të shpalosen në kujtimet e mia, që unë do t’i shkruaj patjetër në të ardhmen” tha ajo.
E pyetur nëse ishin amerikanët ata që ndikuan më së shumti në marrëveshjen që e bëri atë presidente, Jahjaga përsëriti se këto çështje nuk janë për t’u zbuluar dhe diskutuar tani, “por do të vijë një kohë, kur të gjitha këto sekrete do t’i vendos në kujtimet e mia, kurdo që të kem kohë, pas përfundimit të mandatit tim kushtetues si presidente e vendit. Ndoshta për dikë do të jenë befasuese, e për dikë tjetër jo të tilla”
Ndër të tjera, Jahjaga njohu si sukses faktin që është e para grua presidente e Kosovës, e se në karrierën e saj ka thyer shumë barriera.
“Me zgjedhjen time si presidente e Kosovës, unë kam bërë histori jo vetëm për vendin tim, por edhe për të gjithë Ballkanin, pse jo edhe më gjerë. Detyrat, përgjegjësitë dhe gjërat e njerëzit, me të cilët merrem unë, nuk dallojnë aspak me detyrat e përgjegjësitë e një Presidenti mashkull, kudo që veprojnë nëpër vende të ndryshme të botës. Natyrisht që jam ballafaquar me shumë probleme, sfida, madje edhe me një lloj qasjeje seksiste”, tha presidentja. /tesheshi.com/
