Presidentja, Atifete Jahjaga në fjalën e saj në 40 vjetorin e Akademisë së Shkencave dhe të Arteve të Kosovës, tha se Akademia ka rol për të luajtur në ndërtimin e shtetësisë së Kosovës dhe forcimin e demokracisë tonë të re.
Ajo tha se institucionet kosovare duhet ta ndërtojmë kulturën politike të dialogut dhe ta pasurojnë diskursin në sferën publike për të ardhmen tonë të përbashkët, që tejkalon ndasitë ndërmjet forcave politike.
Jahjaga u shpreh se argumenti i forcës dhe fuqia e numrave nuk mund ta zëvendësojë bashkëbisedimin.
“Ne nuk guxojmë të vëmë në rrezik partneritetin me faktorin ndërkombëtar, në veçanti me SHBA-në dhe BE-në, e as t’ua zëmë frymën zhvillimeve demokratike dhe të rëndojmë jetën e qytetarëve të vendit, besimi i të cilëve në secilin prej nesh, qoftë liderë institucionalë ose partiakë, po zbehet çdo ditë e më shumë. Ne duhet të jemi pranë qytetarëve të vendit, sepse vota e tyre na ka zgjedhur për të qenë në shërbim të tyre dhe për t’u garantuar një të ardhme më të mirë”, tha Presidentja.
“E kemi obligim dhe borxh ndaj gjeneratave të tëra që kanë sakrifikuar për të sotmen tonë, që ta kompletojmë dhe ta përmbyllim konsolidimin tonë si shtet.Dialogu me Serbinë është më shumë çështje e konsensusit tonë, që duhet të prodhojë edhe stabilitet të brendshëm por edhe rezultate konkrete, që çon drejt shtetit gjithëpërfshirës por që nuk prek shtetësinë. Kemi hasur në vështirësi, sepse normalizimi i marrëdhënieve ndërmjet shteteve tona është rrugë dykahëshe, e dy bashkëbiseduesve, që ndihmon pajtimin ndërmjet dy popujve tanë dhe që hap shtegun drejt BE-së, që duhet ta mbajë të hapur perspektivën e rajonit në përgjithësi”, deklaroi Jahjaga./tesheshi.com/
