Presidentja, Atifete Jahjaga ka marrë pjesë në Kuvendin vjetor të Rrjetit të Grupit të Grave të Kosovës (RRGGK), ku ka thënë se gratë e Kosovës kanë qenë ato të cilat kanë mbajtur mbi supet e tyre peshën e rëndë të mbijetesës, të rezistencës paqësore, të luftës dhe se pa dyshim që ndërtimi i paqes nuk mund të arrihej pa to.
Ajo në këtë kuvend vjetor që shënon edhe 15-vjetorin e themelimit të kësaj lëvizjeje, ka theksuar se kjo lëvizje përfaqëson zërin më të fuqishëm të gruas për realizimin e të drejtave të saj dhe jetëson vizionin tonë të përbashkët për fuqizimin e shoqërisë dhe shtetit demokratik.
“Në një kohë shumë të rëndësishme për shoqërinë tonë, kur ndërmorëm rrugëtimin drejt rimëkëmbjes pas luftës dhe ndërtimit të paqes, ju besuat se të ardhmen tonë do ta garantonim me pjesëmarrjen e plotë të të gjithë qytetarëve. Besim i cili gjeti përkrahje çdo ditë e më shumë nga gra të çdo fushe të jetës nga i gjithë vendi, të cilat këmbëngulën që gratë të zënë vendin e tyre të merituar në shoqëri. Ju dëshmuat forcën që gruaja ka pasur në shoqërinë tonë përmes vizionit tuaj të qartë se gratë janë shtyllë e shoqërisë dhe kontributi i tyre kyç në çdo fazë të zhvillimit të saj”, ka thënë Jahjaga./tesheshi.com/
