Një shkencëtar që ka ndihmuar në lëshimin e një sateliti në hapësirë, mendohet se është ‘truri’ pas programit të raketave në Korenë e Veriut.
Kim Jong-sik, rreth të 50-ave, thuhet se ka transformuar arsenalin e Koresë së Veriut nga raketa të pavlera në ato interkontinentale balistike, në gjendje për të mbajtur mbushje bërthamore.
Ai ishte një ekspert teknik i panjohur, por i bëri përshtypje liderit komunist Kim Jong-un pasi ndihmoi në lëshimin e një sateliti në hapësirë.
Që prej atëherë, ai ka ngjitur me shpejtësi shkallët e karrierës dhe tashmë mban titullin më të lartë të nderit, Urdhrin e Kim Jong-il.
Kjo për shkak se ka ndihmuar në zhvillimin e armëve të tilla që kërcënojnë jo vetëm fqinjët, por edhe SHBA-në.
Mendohet se prova e radhës së raketave është vetëm pak orë larg.
Inteligjenca e Koresë së Jugut mendon se brenda pak orësh do të testohet një tjetër raketë balistike interkontinentale.
Michael Madden, një njohës i mirë i çështjeve të Koresë së Veriut, thotë se shkencëtari i raketave është një figurë e rëndësishme.
“Ai është njeriu që ka identifikuar problemet teknike dhe ka bërë përparime të rëndësishme”, thotë Madden.
Ai shton se Kim Jong-sik nuk ka përparuar në karrierë për shkak të lidhjeve, diçka e zakonshme në vendin komunist.
Sipas tij, ai ra në sy kur zgjidhi me sukses hedhjen e një rakete në dhjetor të vitit 2012, pak muaj pasi një hedhje tjetër kishte dështuar 10 sekonda pas nisjes. /tesheshi.com/
