Gazeta “55” e Fahri Balliut e ka parë si osmanizim faktin e ardhjes së uniformave të reja të policisë shqiptare nga Turqia. Në raportimin e saj, kjo gazetë që konsiderohet si “shpata e zhveshur” e PD-së, pavarësisht se drejtohet nga një ish-komunist fanatik, bën përzjerje emrash, termash e nocionesh historike që në fund “prodhojnë një gur për të vrarë tre zogj”: Ramën (deri këtu janë në rregull se kështu jua dikton pozicionimi politik-editorialist), Erdoganin, dhe më pas ish-Perandorinë Otomane, me të njëjtën gjuhë të nacional-komunizmit.
“Qindra policë u përdorën dje si manekinë duke lënë punën për tekat e kryeministrit dhe ndihmësit të tij, në një operacion imazhi që rrezikon të na nxijë faqen. Kur Brukseli po shqyrton mundësinë për vendosjen e sanksioneve ndaj regjimit të Erdoganit, Edi Rama e rreshtoi policinë e Shtetit nën uniformat dhe urdhrat e ‘portës së Erdoganit’, duke na shndërruar “de facto” në prodhues jeniçerësh për ëndrra sulltanore”, shkruhet në fillim të shkrimit, për të përfunduar më pas me perlën: atë të fomave osmane tek policia shqiptare, ku nëse nuk do ekzistonte një foto reale e atyre uniformave tek shtatet e efektivëve të rendit, fantazia e nxitur nga frazat e shkrimit do e hipte ata mbi kuaj, ku në dorë mbajnë shpata e jataganë, e padyshim veshje me parzmore.
“Kjo do të thotë që Shqipëria do t’i rikthehet ndikimeve të formave osmane të forcave të armatosura. Në Shqipëri ka një kujtesë historike për format ushtarake të urdhrave të jeniçerëve. Nëse Rama i ka menduar policët e Shqipërisë si asqerë të ‘vëlla Taipit’, duhet thënë se kjo nuk është gjëja e duhur”, shkruhet pra tek 55-sa e Fahri Balliut. /tesheshi.com/
