Në Manastir po ndodh një proces restaurimi i xhamive më të mëdha atje. Këto ditë përfundoi restaurimi i plotë i xhamisë së Isakut e cila konsiderohet më e larta në Ballkan, ndërsa po punohet edhe në xhaminë Hajdar Kadi, që llogaritet një nga më të bukurat në Ballkan.
Së shpejti duhet të fillojë edhe i restaurimi xhamisë së Haxhi Mahmud Beut, për të përfundur kështu kthimi i pamjes autentike të cilën e kanë patur xhamitë në Manastir të ndërtuara pesë shekuj më parë.
Projekti për restaurim po financohet nga fondacione të ndryshme nga Turqia.
Myftiu i Manastirit, Pëllumb Veliu, për xhaminë Hajdar Kadi thotë se është princesha e Ballkanit, ndërsa për kthimin e pamjes së saj autentike thotë se do të shpenzohen 2.500.000 euro që nuk janë shumë nëse kihet parasysh se bëhet fjalë për ndërtesë me vlerë të madhe që është një monument i kategorisë së parë.
Restaurimi do të shpëtojë në momentet e fundit xhaminë Kadi Hajdar e cila ishte e rrënuar për dekada të tëra, ndërtimi i të cilës daton nga viti 1561 dhe është një nga kryeveprat e arkitekti osman Mimar Sinan, i cili ka patur epitetin “Michelangelo i Lindjes së Mesme” për shkak të arkitekturës spektakolare të xhamive të cilat i ka ndërtuar, atë të Sulejmanit në Stamboll dhe Selimit në Edrene.
Xhamia e Isakut është restauruar dhe pritet të vihet në funksion këto ditë, ndërsa në inagurim, sipas paralajmërimeve, do të jetë i pranishëm Presidenti turk, Rexhep Tajip Erdogan.
Gjatë restaurimit kompanitë ndërtimore janë përpjekur të përdorin materiale natyrore që janë përdorur 500 vjet më parë për kthimin e objekteve në gjendjen e tyre origjinale.
Ndryshe, Manastiri ka 11 xhami, nga të cilat vetëm katër janë aktive.
Përgatiti: Bekim Laci – tesheshi.com
