“Shiritin” e operacionit “Peshkaqenët” pritet ta presë Inspektorati i Lartë i Deklarimit dhe Kontrollit të Pasurive, i cili do të dërgojë së shpejti në Prokurori një numër dosjesh ku nuk përputhet pasuria reale me atë të deklaruar nga ana e një sërë zyrtarëve të shtetit, të niveleve të ndryshme, përfshirë dhe ato më të larta të politikës .
Pikërisht këto dosje do të jenë edhe indicjet e para për të nisur hetimet më masive dhe proaktive ndaj klasës politike dhe drejtuese që janë ndërmarrë ndonjëherë në Shqipëri.
Këto hetime janë mbështetur fuqishëm nga SHBA dhe BE, dhe nga ambasadori amerikan Donald Lu është cilësuar me simbolikë si “gjuetia e Peshkaqenëve”.
Në ILDKP prej dy vitesh është mbledhur një superserver, një bazë shumë e pasur të dhënash për të gjithë politikanët, gjyqtarët, prokurorët, por edhe zyrtarët e tjerë të shtetit.
Aty figurojnë të dhënat mbi pasurinë e deklaruar dhe hetimet që janë bërë në lidhje me pasurinë reale, ku ka konto bankare, foto të pasurive të patundshme, bizneseve, por edhe aseteve të të tjera si makina apo mjete alternative transporti.
Po ashtu janë llogaritur shpenzimet që zyrtarët bëjnë gjatë një viti për jetesë, shkollimin e fëmijëve, pushimet luksoze etj.
Dosjet e zyrtarëve janë ndarë në dy pjesë: ato që do të shkojnë për vetting dhe ato që do të dërgohen menjëherë në Prokurori.
Dosjet që do të çohen për vetting janë për të gjithë gjyqtarët e prokurorët e Republikës, që do të kalojnë një nga një para komisionit të verifikimit, i cili do të shqyrtojë edhe materialet që kanë ardhur nga Inspektorati i Lartë i Kontrollit dhe Deklarimit të Pasurive.
Ndërkaq, dosjet e zyrtarëve që do të dërgohen në Prokurori, mësohet se janë voluminoze dhe bëhet fjalë për një numër të konsiderueshëm që shkon deri në 800 dinjitarë shtetërorë të të gjitha niveleve.
Dosjet e zyrtarëve qendrorë do të dërgohen në Prokurorinë e Tiranës, që tashmë drejtohet nga Dritan Rreshka, ndërsa dosjet e qarqeve në Prokuroritë e Rretheve.
Pikërisht nga pasuria, pra mosrakordimi i deklarimeve me faktet reale do të nisë dhe hetimi penal tashmë nga ana e prokurorive.
Me krijimin e SPAK-ut pas 3 muajve, dosjet tashmë do të jenë të shoshitura dhe Prokuroria Speciale do të bëjë shtytjen e tyre për t’i çuar në Gjykatë.
Mësohet se ILDKP-ja ka marrë ndihmë të konsiderueshme nga SHBA dhe BE-ja për të gjurmuar pasuritë e fshehura nëpërmjet institucioneve të specializuara siç është FBI-ja apo Europol-i.
Dy vjet më parë kur ILDKP-ja sapo kishte nisur të grumbullonte të dhënat në serverin e saj, Kryeprokurori i atëhershëm Adriatik Llalla tentoi ta merrte nën sekuestro, por kreu i ILDKP-së e çoi menjëherë çështjen në Gjykatë e cila vendosi që Prokuroria të mos i afrohej.
Ndërkaq, nisja e operacionit të “peshqve të mëdhenj”, ka sjellë kode të ndryshme në komunikimin publik.
Botuesi Nikollë Lesi, i cili në qëndrimet e tij mbron mjaft LSI-në, shkroi një koment ku e kërcënonte Edi Ramën, se “nëse do të bëjë ndonjë aventurë për të çuar ndonjë politikan të opozitës në hetime, do të jetë popullin te dera e kryeministrisë”.
Ky mesazh që i është bërë Ramës, vjen pak ditë pasi iu kujtua po nga LSI-ja, madje drejtues të saj, fati i Esat pashë Toptanit, i cili u vra në Paris nga Avni Rustemi. /tesheshi.com/
