Nga Blendi Gashi
Njihet fenomenti i antiprotestave nga ana e një pushteti, kur sheh se opozita merr revansh me përkrahësit e saj në rrugë. Dhe është ky momenti kur ata që janë në krye të vendit, vendosin të tregojnë forcën, t’i thonë opozitës dhe se ne jemi po aq të fuqishëm sa ju, se dhe ne na do populli, ndryshe nga ç’mendoni ju se na urren me mijra. Dhe kështu, ajo vendos të mbush sheshet me përkrahës të saj, si për të bërë një garë numrash me kundërshtarin.
Kështu pritet të ndodh dhe në Kosovë me dyshen në aleancë PDK-LDK, mu në kohën që opozita kosovare ka paralajmëruar protestën e radhës.
Por si komentohet ky zhvillim i ri?
Politologu, Albinot Maloku, thotë se mbajtja eventuale e një antiproteste nga subjektet politike të cilat udhëheqin me vendin, gjoja kundër opozitës jo-konstruktive është hapi i menduar më i keq i subjekteve politike të koalicionit qeverisës në vend.
“Aktorët aktualë politik, si të opozitës e posaçërisht të pozitës, sikur fushatën e ardhshme zgjedhore po fillojnë ta mendojnë ta realizojnë me mjete të dhunshme. Kjo klasë politike, e tëra dështuar në mungesë të vizioneve konkrete dhe e manipuluar edhe nga forca ndërkombëtare politike, e ka humbur toruan e situatës në të cilën ndodhet Kosova dhe qytetari i saj jashtë okupimit serb”, ka deklaruar Maloku për tesheshi.com.
Por analisti politik, Ardian Megjani, thotë se është normale dhe lehtësisht e mundshme që edhe partitë në pushtet të thërrasin një anti-protestë në mbrojtje të ekzekutivit.
Ai në një prononcim për tesheshi.com thotë se praktika të tilla janë realizuar edhe në shtete të tjera, si p.sh. në Shqipëri, gjatë mandatit të fundit të demokratëve, ndërsa socialistët në opozitë organizonin protesta, mazhoranca në atë kohë organizoi një manifestim në përkrahje të qeverisë, ku dhe numri ishte shumë më i madh sesa i demonstruesve të opozitës.
“Pra, një manifestim i tillë mund të ndodhë, ashtu siç mund të ndodhë dhe prezenca shumëfish më e madhe e qytetarëve sepse bazohem në elektoratin e dy partive në qeveri. Kurse sa i përket efektit ai mund të kete një efekt politik dhe psikologjik. Tek opozita, qytetarët dhe mediat të cilat mund të ndryshojnë ndonjë taktikë politike karshi çështjeve të fundit”, ka deklaruar Megjani.
Analisti tjetër, Islam Krasniqi thotë se në rast se pozita organizon një antiprotestë kundër opozitës, atëherë varësisht nga numri i pjesëmarrsëve, do të vërtetohet edhe fuqia e pozitës. Sipas tij, një protestë e tillë ka ndodhur vitin e kaluar në Turqi për fuqizimin e pozitës së presidentit Taip Erdoganit, si dhe një e tillë edhe në Shqipëri.
“Po në rast së populli del në mënyrë masive në protestë, atëherë pozita e forcon qëndrueshmërinë e saj; në rast së numri i protestuesve është i vogël, atëherë pozita e humbë fuqinë e saj. Nuk bënë të anashkalojmë edhe ndonjë konflikt mes militantëve nga pozita dhe opozita, e cila mund të sjellë vëllavrasje në vend. Andaj, një gjë e tillë, nuk do të ishte për të mirën e vendit”, ka deklaruar Krasniqi për tesheshi.com.
Portali tesheshi.com gjatë ditës ka tentuar të marrë një prononcim edhe nga zyrtarët e PDK-së për t’i pyetur se kur mund ta thirrin antiprotestën nëse veç kanë vendosur ta mbajnë një të tillë, por ka qenë i pamundur kontakti këtë subjekt politik. /tesheshi.com/
