Këtë të diel ishte 1 maji, e ashtëquajtur “dita e solidaritetit ndërkombëtar të punonjësve”. Tek shqiptarët kjo ditë ka ende shijen e “1 maj”-eve të dikurshme që festoheshin me pompozitet shtetëror, por dhe me një ngazëllim masiv, pasi gjindja derdhej rrugëve duke sfiluar e prezantuar veshjen e re pranverore me rastin e festës, fjala vjen ndonjë pantollë doku tek meshkujt, apo ndonjë fustan basme tek femrat.
Por më së shumti, kujtesa të çon tek parakalimet e 1 majit, ato në bulevardin “Dëshmorët e Kombit”, ku masat e gjera punonjëse, rinia kooperativiste, forcat tona ushtarake, kalonin para tribunës së udhëheqjes duke u përshëndetur me dorë nga ai, shoku Enver.
Por, siç duket dhe nga kjo foto që kemi publikuar, në vitet e para kremtimi i 1 majit bëhej dhe duke vënë lojë botën kapitaliste, ata që tentonin t’i pinin gjakun proletariatit, por që në Shqipëri nuk kishin mundur dot të gjenin terren. Aty ata kishin thyer hundët pas triumfit të revolucionit popullor.
Interesant është fakti se aty duken dhe dy trekëmbësha, që logjika ta thotë se ishin një lloj mesazhi ideologjik.
Por pse dy? Më gjasë, njëri trekëmbësh është për imperalizmin amerikan dhe tjetri për socialimperializmin sovjetik.
Kjo foto është realizuar nga Fetah Biza dhe duhet t’u përkasë fundit të viteve ’60 dhe fillimit të viteve ‘70. /tesheshi.com/
