Shefja e zyrës së BE-së në Kosovë, Natalia Apostolova, pret që pas çertifikimit të rezultateve të zgjedhjeve udhëheqësit politikë të formojnë një qeveri të qëndrueshme që përshpejton dhe zbaton agjendën për reforma drejt rrugës evropiane.
Sipas saj, Kosova ka një perspektivë të qartë evropiane dhe njerëzit e Kosovës presin një udhëheqje të përgjegjshme që do të bëjë përparime të rëndësishme përgjatë kësaj rruge.
“Tani është përgjegjësi e udhëheqësve politikë të dëgjojnë qytetarët e tyre dhe të formojnë një qeveri të qëndrueshme që do t ‘i shërbejë interesave të popullit. Kosova përballet me shumë sfida, duke filluar nga papunësia e lartë dhe sistemi arsimor me performancë të ulët, deri te korrupsioni dhe sundimi i dobët i ligjit, të cilat mbeten pengesë për tërheqjen e investimeve të qëndrueshme për zhvillimin e ekonomisë. Prandaj është e rëndësishme që liderët politikë t’i marrin seriozisht këto sfida, të formojnë një qeveri të fortë dhe të fillojnë reformat që populli i kërkon”, ka deklaruar Apostolova.
Shefja e BE-së u rikujton udhëheqësve politikë kosovarë domosdoshmërinë e zbatimit pa vonesa të marrëveshjeve të arritura në dialogun me Serbinë. /tesheshi.com/
