Lista Serbe ka mbrojtur ministrin e saj, Nenad Rikallo, ndaj kërkesës së opozitës për shkarkimin e tij nga qeveria, pas akuzave të banorëve se ka kryer krime në luftën e fundit.
Deputeti Slavko Simiç tha se disa deputetë dhe grupe të deputetëve përmes mentalitetit të politikës kërkojnë që të gjejnë viktimën për të fshehur dështimet e tyre.
Ai i ka quajtur të pavërteta të gjitha akuzat ndaj Rikallos se ai ka maltretuar dhe torturuar qytetarët e Prishtinës, gjatë kohës së luftës në Kosovë, duke thënë se ato janë të pavërteta dhe po bëhen për qëllime të linçimit të ministrit serb të Bujqësisë.
“Më vjen shumë vështirë të besoj që disa që deri dje kanë qenë në pushtet e sot janë në opozitë nuk kanë zgjidhje konkrete për qytetarët tanë, të cilët përballen me probleme dhe më vjen rëndë që disa të tjerë përmes mediave tentojnë që të krijojnë atmosferën e linçimit të zotit Rikallo.
Duket se jeni munduar që përmes mediave të krijoni një eufori nacionale, por në këtë rast nuk e keni arritur, pasi qytetarët nuk kanë besuar në argumentet që keni nxjerrë. Ky është mentaliteti politik, i cili është i pranishëm te disa deputetë dhe grupime, dhe atë e përdorni gjithmonë kundër dikujt për të fshehur paaftësinë tuaj dhe për të tejkaluar problemet ekonomike me të cilat përballen qytetarët”, ka thënë Simiç.
Kurse deputeti tjetër i “Srpska”-s, Sasha Milosavljeviç i ka quajtur absurd akuzat se Rikallo ka bërë krime, duke thënë se serbët kanë qenë të sulmuar fizikisht.
Ai tha se Lista Serbe është treguar e përgjegjshme dhe se nuk kanë vepruar asnjëherë ndaj vullnetit të qytetarëve.
“Nuk dëshirojmë ta zvogëlojmë punën e këtyre institucioneve. Ju mund të shihni nëse ndonjëherë kemi qenë kundër interesave të qytetarëve të Kosovës”, ka thënë ai. /tesheshi.com/
