Nga Bashkim Kastrati
Është folur e shkruar vazhdimisht për privilegjet, pagat dhe mëditjet që i marrin qeveritarët e Kosovës, duke filluar nga kryeministri, zëvendësit e tij, ministrat, zëvendësministrat dhe këshilltarët politik. I gjithë ky staf politik qeveritar shpenzon goxha para të taksapaguesve të Kosovës.
Instituti Demokratik i Kosovës ka bërë një llogaritje të shpenzimeve të qeveritarëve që mbajnë poste politike dhe kostoja që ata shpenzojnë del të jetë e lartë, nëse e kemi parasysh gjendjen e rëndë sociale dhe ekonomike në të cilën jetojnë qytetarët e Kosovës.
Kryeministri i Kosovës, Isa Mustafa ka dy zëvendëskryeministra, ndërsa secili ministër i Qeverisë së Kosovës në kabinetin e tij ka së paku dy zëvendësministra. Pra 19 ministritë kanë gjithsejtë 42 zëvendësministra.
Paga mesatare e një zëvendësministri është 1,082 euro, ndërsa për një muaj nga Buxheti i Kosovës për pagat e tyre mesatarisht shpenzohen 45 mijë e 477 euro. Ndërsa, për një vit për pagat e 42 zëvendësministrave të Qeverisë së Kosovës shpenzohen mesatarisht 545 mijë euro 721 euro. Kjo shumë mund të jetë edhe më e madhe, por është e ndryshueshme sepse mëditjet që marrin këta zyrtarë gjatë udhëtimeve jashtë vendit ndryshojnë varësisht se sa herë udhëtojnë dhe në cilin vend, pasi që mëditjet ndryshojnë nga njëri shtet në tjetrin. Por në këto shifra që po paraqesim nuk janë përfshirë mëditjet dhe shpenzimet tjera si telefonat, udhëtimeve etj.
Ja sa para na kushtojnë 149 këshilltarët politikë
Ashtu si zëvendësministrat, edhe pozitat e këshilltarëve politik në të shumtën e rasteve janë vetëm për të punësuar personat e afërt me partitë politike, ata që kontribuojnë gjatë zgjedhjeve në mënyra të ndryshme dhe militantët partiakë.
Por këshilltarët politikë i kushtojnë goxha shumë buxhetit të Kosovës. Për një muaj të 149 këshilltarët politik në tre institucionet kryesore: Presidencë, Qeveri e Kuvend marrin pagë mesatarisht 704 euro, e që në total për një muaj në pagat e tyre mesatarisht shpenzohen 104 mijë e 915 euro.
Pagat e këshilltarëve politikë për një vit pune në institucionet e Kosovës arrijnë shumën e hiç më pak se 1 milionë e 258 mijë e 975 euro.
Qeveria e Kosovës përfaqësohet nga një kryeministër dhe dy zëvendëskryeministra, 19 ministra dhe 2 ministra pa portofol. Nga buxheti për paga të këtyre zyrtarëve të lartë, për çdo muaj mesatarisht ndahen 24 mijë e 67 euro. Paga mesatare e secilit zyrtar të lartë është 1,146 euro. Për një vit Buxheti i Kosovës për pagat e këtyre zyrtarëve të lartë ndanë mesatarisht 288 mijë e 809 euro.
Pas zbërthimit të shpenzimeve veç e veç për ministrat, zëvendës-ministrat dhe këshilltarët në institucionet qendrore, është koha të dimë sa i kushton buxhetit të Kosovës i gjithë kabineti qeveritar.
Kryeministri, dy zëvendësministrat, 19 ministrat, dy ministrat pa portofol, 42 zëvendësministrat dhe 149 këshilltarët politik të institucioneve politike të Kosovës, për paga të tyre çdo muaj mesatarisht nga buxheti i Kosovës pranojnë 174 mijë e 459 euro.
Totali i mesatares për paga gjatë një viti për të gjithë këta zyrtar është 2 milionë e 93 mijë e 505 euro, pa llogaritur shpenzimet e telefonave zyrtar, veturave zyrtare, udhëtimet jashtë vendit, mëditjet për udhëtimet jashtë vendit, shpenzimet për dreka e darka zyrtare, etj.
Qytetarët: Qeveritarët nuk i meritojnë këto paga
Tesheshi.com ka pyetur disa qytetarë në lidhje me këto shpenzime që bëhen për stafin politik në qeverinë e Kosovës.
Burim Kelmendi thotë se këto paga janë të larta dhe se është e domosdoshme që të ulet numri i stafit politik nëpër institucione.
“Ma së pari çka duhen dy zëvendëskryeministra, çka duhen nga 2-3 zëvendësministra, çka i duhen mandej ka 4-5 këshilltarë një ministri. Kjo po shihet qartë se vetëm po i punësojnë sa me ua dhënë nga një rrogë të mirë dhe seriozisht nuk e di çka bëjnë këta njerëz. Çka bënë zëvendësministri, çfarë kompetenca ka, apo këshilltarët janë krejt kot, vetëm i shohim duke qëndruar nëpër kafe me kravata tërë ditën. Është mëkat që të tillët të paguhen nga paratë e ne qytetarëve të varfër”, thotë Kelmendi.
Ndërsa Bujar Gashi thotë se duhet ulur pagat e zyrtarëve të lartcekur dhe duhet rishikuar mundësitë për reduktimin e ministrive.
“Unë mendoj se së pari duhet të reduktohet numri i ministrive, ne jemi vend i vogël që t’i kemi 21 ministri, as vendet që kanë dhjetëra milionë banorë dhe territor më shumë se Kosova nuk kanë kaq ministri. Kosovës i duhen diku rreth 10 ministri dhe sigurisht që edhe pagat edhe krejt shpenzimet tjera kishin qenë më të vogla. Me këtë sistem që po vazhdon nuk përparon ky vend, nuk duhet me u pagua dikush që nuk bën gjë”, u shpreh Gashi. /tesheshi.com/
