Nga Blendi Gashi
Janë bërë saktësisht tetë ditë që kur Agjencia Kosovare për Intelegjencë (AKI) ka mbetur pa “zot shtëpie”, pas dorëheqjes së papritur që dha më 27 janar Agron Selimaj.
Largimi i këtij të fundit çoi shumë pluhur në opinion ku u dhanë shumë versione, nëse la pozitën siç tha “për t’iu përkushtuar familjes” apo u largua me urdhër të krerëve të shtetit.
Burime të portalit tesheshi.com kanë konfirmuar se e saktë është kjo e dyta. Arsyeja kryesore pse Selimajt ju tregua dera është se institucioni që drejtoi ai për dy vite nuk kreu si duhet “detyrat e shtëpisë”, sidomos në veri të vendit, ku situata është tensionuar në vazhdimësi.
Kulmi i pakënaqësisë ndaj Selimajt është arritur sidomos me murin në veri, ku ndërtimi i tij kapi gafil të gjitha institucionet, përfshirë edhe AKI-në, spiunët e të cilës duhet jenë zgjuar çdo herë dhe të japin informacione ç’ndodh në çdo cep të vendit.
Po ashtu, me kalimin e kohës sipas burimeve është vënë në pikëpyetje edhe profesionalizimi i tij për të drejtuar një agjenci si AKI-ja, pasi që për të qenë kryespiun i vendit duhet pasur njohuri në të gjitha fushat.
“Selimaj është vlerësuar si njeri i qetë dhe me njohuri të mira andaj edhe është emëruar si kryespiun. Por fatkeqësisht ai nuk ka arritur të tregoi rezultate që janë pritur prej tij. Edhe pse është vlerësuar se me largimin e tij veç pas dy viteve mund t’i dëmtohet reputacioni AKI-së, megjithatë është vendosur që të lirohet nga pozita dhe në vend të tij të vendoset një njeri tejet më profesional dhe që njeh mirë pothuajse çdo gjë që ndodh në vend“, thotë burimi.
A do ulet Jahjaga në krye të AKI-së?
Pas largimit të Selimajt, mediat kosovare raportuan pa rreshtur se vendin e tij do e zë ish-presidentja Atifiete Jahjaga.
Burime të portalit tesheshi.com konfirmojnë se një gjë e tillë vështirë se mund të ndodh, ndonëse kanë pranuar se Jahjaga ka përvojë të gjatë në fushën e sigurisë, pasi për disa vite para se të zgjidhej presidente ka qenë zëvendësdrejtoreshë e policisë.
“Nuk besoj se do vendoset për Atifeten. As ajo nuk mendoj se është e interesuar ta marrë këtë post, pasi po kryen një punë të mirë në arenën ndërkombëtare me takimet që po zhvillon në vazhdimësi. Një prej arsyeve pse nuk do pranonte të ulet në karrigen e kryespiunes mund të jetë pikërisht ndërrimi i shpeshtë që po bëhet me drejtor të AKI-së, ku po largohen papritur. Andaj, nëse do emërohej dhe më pas largohej reputacioni i saj do dëmtohej shumë, derisa tani vlerësohet shumë si brenda vendit por jashtëzakonisht shumë edhe nga komuniteti ndërkombëtarë”, ka thënë burimi.
Ndryshe, përveç Jahjagës për drejtor të AKI-së janë përmendur edhe emri i ambasadorit Ylber Hysa, Latif Merovci që aktualisht mban pozitën e zv.drejtorit të AKI-së, dhe Fisnik Rexhepit, ish-këshilltari i ministrave, Bajram Rexhepit e Bekim Çollakut. /tesheshi.com/
