Nga Bashkim Kastrati
Disa vite pas mbarimit të luftës në Kosovës në skenë kanë dalë disa politikanë, biznesmen dhe individë me ndikim që kanë bërë pasuri të madhe materiale. Disa prej tyre që kanë marrë pozita të larta politike dhe institucionale kanë qenë të detyruar që ta deklarojnë pasurinë në Agjencinë Kundër Korrupsionit dhe aty është parë që pasuri e tyre është milionëshe, ndërsa duhet theksuar se pasuria e tyre në vazhdimësi ka pasur trend të rritjes.
Kjo ka bërë që individë nga partitë opozitare dhe disa organizata të shoqërisë civile të kërkojnë hetim në lidhje me pasurimin e shpejtë të disa politikanëve dhe nëse ata nuk mund ta justifikojnë me fakte pasurinë e tyre, atyre duhet që t’i konfiskohet pasuria.
Në lidhje me këtë çështje ka pasur shumë deklarime, tryeza dhe debate, por ende nuk është bërë diçka konkrete nga institucionet kompetente.
Lufta ndaj pasurimit të paligjshëm është dhe duhet të jetë prioritet i Qeverisë së re të Kosovës, sepse është instrumenti më efektiv për të luftuar korrupsionin, thonë përfaqësues të shoqërisë civile, përderisa zyrtarë të qeverisë theksojnë se do ta rishikojnë legjislacionin për këtë çështje.
Në ligj i quajtur “anti- mafia”, nëpërmjet së cilit do të rregullohej çështja e përfitimeve të pasurisë në mënyrë të paligjshme dhe rrjedhimisht do të luftohej korrupsioni dhe krimi i organizuar, ka më shumë se shtatë vjet që është iniciuar, por deri më tani nuk është jetësuar asnjëherë.
Një premtim për konfiskimin e pasurisë së fituar në mënyrë të paligjshme e ka dhënë ministri i Drejtësisë, Abelard Tahiri me të marrë detyrën. Ai ka thënë se në një të ardhme të afërt do ta rishikojë legjislacionin për këtë çështje, pa përmendur në mënyrë specifike ligjin “anti-mafia”.
“Do të krijojmë mekanizma efikas, do të krijojmë politika, të cilat do të mundësojnë që ajo pasuri kudo qoftë, qoftë te zyrtarë, qoftë te bizneset, që është e pajustifikueshme, t’i kthehet shtetit dhe qytetarëve të Republikës së Kosovës”, ka thënë Tahiri.
Ligjet ekzistojnë, por nuk zbatohen
Por sipas përfaqësuesve të shoqërisë civile, Kosova ka legjislacion të mjaftueshëm që mundëson luftimin e pasurisë së paligjshme, por ata thonë nuk ka vullnet dhe guxim që të zbatohet legjislacioni në fuqi.
Ehat Miftaraj nga Instituti i Kosovës për Drejtësi ka thënë për tesheshi.com se mungon vullneti politik për zbatimin e ligjit për konfiskimin e pasurisë.
Ai thotë se edhe përkundër faktit se Kosova në vitet e fundit ka miratuar kornizë ligjore adekuate lidhur me sekuestrimin dhe konfiskimin e pasurisë së fituar në mënyrë te kundërligjshme, mungon vullneti për zbatim në praktikë.
“Instituti i Kosovës për Drejtësi gjatë monitorimit të rasteve të korrupsionit, krimit të organizuar në gjykata, ka gjetur se në raste shume të rralla prokurorët paraqesin kërkesa për sekuestrim të pasurisë së fituar me vepër penale edhe pse Kodi i Procedurës Penale përcakton një obligim të tillë”, thotë Miftaraj.
Ai thotë se sekuestrimi dhe konfiskimi i pasurisë së paligjshme nuk po ndodh pasi që nuk ka një vullnet për të luftuar sa duhet krimin e organizuar dhe korrupsionin, pasi që këto dukuri janë të ndërlidhura me të gjitha dukuritë tjera negative, siç është edhe pasurimi në mënyrë të paligjshme.
“Sekuestrimi dhe konfiskimi i pasurisë së fituar në mënyrë të kundërligjshme varet edhe nga vullneti i sistemit të drejtësisë për të luftuar me të vërtetë krimin e organizuar dhe korrupsionin. Në mungesë të rezultateve konkrete, respektivisht aktgjykimeve dënuese në këto raste, nuk mund edhe të pritet që të kemi konfiskim të pasurisë së fituar ne mënyrë te kundërligjshme”, theksoi Miftaraj.
Ndryshe, edhe pse në Kosovë nuk ekziston ligji “anti mafia” një Ligj për Zgjerimin e Kompetencave për Konfiskimin e Pasurisë së Fituar në Vepër Penale, sipas zyrtarëve të lartë qeveritarë, e kryen funksionin e njëjtë.
/tesheshi.com/
