Ja pse Pierluigi Collina është arbitri më i mirë i të gjitha kohërave

Gjyqtari legjendar italian, Pierluigi Collina, është, sipas mendimit të shumicës së njohësve të futbollit në botë, arbitri më i mirë i të gjitha kohërave që ka dhënë drejtësi në fusha anembanë botës.

Sot, Collina është anëtar i komitetit të arbitrave të UEFA-s dhe përveç kësaj, ai është edhe këshilltar i Shoqatës së Arbitrave Italiane të Futbollit, por është gjithashtu një pedagog i shkëlqyer dhe një mysafir i mirëpritur në të gjitha sportet, veçanërisht qarqet e futbollit.

Collina ishte arbitri më i mirë i vitit gjashtë herë radhazi në periudhën më të mirë të karrierës së tij të arbitrimit.

Collina lindi më 13 shkurt 1960 në Bolonjë, ku ndoqi edhe universitetin, duke u diplomuar për ekonomi. Ai ka luajtur futboll në vitet e adoleshencës dhe ndodhi që nga kurioziteti aplikoi për një kurs arbitrimi. Ecuria ishte befasuese, pasi në çdo ndeshje kundërshtarët ishin të kënaqur me të. Pas tre sezonesh në Ligën e Tretë dhe të Dytë, ai përfundoi në listën për Ligën e Parë, ku në vitin 1995 arbitroi deri në 43 ndeshje.

FIFA e vuri re këtë dhe e futi në listën e arbitrave për Lojërat Olimpike të Atlantës në vitin 1996, ku ai arbitroi ndeshjen finale mes Nigerisë dhe Argjentinës.

Bota filloi të fliste për një arbitër të madh me një pamje të pazakontë me sy të mprehtë, duke u bërë shënjestër e fotoreporterëve, por edhe shkaktar i frikës tek futbollistët e padisiplinuar.

Një nga cilësitë e shkëlqyera që e bënë famoz këtë drejtësidhënës italian në fushë ishin padyshim aftësia e tij për të komunikuar rrjedhshëm me lojtarët në katër gjuhët botërore (frëngjisht, spanjisht, italisht dhe anglisht). Tjetër: përpara çdo ndeshjeje, Collina “studionte” të dyja skuadrat dhe mësonte emrat e tyre në mënyrë që të mund t’i mbante gjërat në fushë nën kontroll.

Italiani konsiderohej se kishte “VAR” në sytë e tij sepse arbitrit më të mirë në botë nuk mund t’i mungonte asgjë dhe kjo ishte një nga arsyet që futbollistët e respektonin aq shumë.

Kur ishte 24 vjeç, Collina u diagnostikua me një formë alopecie agresive (humbje e papritur e flokëve). Kështu i humbën flokët shumë herët dhe më pas Federata Italiane e pezulloi, duke besuar se sëmundja e tij do të ndikonte keq në imazhin e saj në botë.

Kështu, karriera e Collina-s mund të kishte përfunduar para se të fillonte, por për fat ai u rikthye në listën e gjyqtarëve dhe pjesa tjetër është histori e jashtëzakonshme suksesi. /tesheshi.com/