Nga Bashkim Kastrati
Partitë politike që kanë qenë në pushtet PDK dhe LDK që tashmë kanë lidhur koalicione parazgjedhore me parti të tjera, nuk po përmendin fare në fushata dhe në takime me qytetarë çështjen e Demarkacionit dhe asociacionit të komunave me shumicë serbe, që njihet ndryshe edhe si Zajednica.
Këto janë dy nga arsyet që e quan vendin në zgjedhje të parakohshme dhe disa muaj para se të mbahen këto zgjedhje, partitë opozitare kanë kërkuar që të mbahen zgjedhjet dhe qytetarët të vlerësojnë se a janë pro apo kundër demarkacionit dhe zajednicës përmes votës dhe kjo do të përcaktonte edhe vazhdimësinë dhe epilogun e këtyre dy çështjeve.
Deri më tani në fushata dhe aktivitete elektorale kandidatë dhe krerët e partive gjatë fjalimeve të tyre nuk po i përmendin fare këto dy çështje. Kjo ndoshta po bëhet qëllimisht, pasi që diheshin qëndrimet e tyre paraprake, por edhe vullneti i qytetarëve të Kosovës që ishin kundër këtyre çështjeve, e para se Kosova mendohet se po humb tokë afër kufirit me Malin e Zi dhe e dyta që përmes Zajednicës, Serbia po e shtrinë ndikimin direkt dhe rrezikohet ndarja e Kosovës.
Sipas njohësve të çështjeve politike, partitë që kanë qenë në pushtet nuk po merren me këto tema, pasi që e dinë mendimin e qytetarëve për këto çështje dhe ata fokusin e kanë përqendruar tek çështjet ekonomike dhe sociale. Kjo pasi që dihet se Kosova vazhdon të përballet me një papunësi, varfëri dhe moszhvillim ekonomik.
Partitë që kanë qenë në pushtet i frikësohen ndëshkimit të elektoratit
Opinionisti Islam Krasniqi ka thënë për tesheshi.com se krerët dhe kandidatët për deputet nga radhët e PDK-së dhe LDK-së duhet që të sqarojnë qëndrimet e tyre për çështjen e Demarkacionit dhe Zajednicës, në mënyrë që të testohet edhe vullneti i qytetarëve, por sipas tij këto dy parti po heshtin qëllimisht për këto dy çështje të rëndësishme për Kosovën.
“Heshtja e dy partive të cilat ishin në pushtet lidhur më Demarkacionin dhe Asociacionin mundohet të krijojë mjegulli te qytetarët që përsëri t’ia “vjedhin” votat me deklarata false. Dy partitë më të mëdha PDK dhe LDK në rast së vijnë në pushtet me çdo kusht do të tentojnë t’i ratifikojnë këto marrëveshje, sepse janë kontribut i mosdijes së tyre dhe heshtin në fushatë zgjedhore, duke mos ju rënë në gojë asnjëherë këto marrëveshje, sepse qytetari i ndëshkon. Patjetër duhet ta thonë të vërtetën lidhur më këto marrëveshje, nëpër fushata zgjedhore, që populli ta jep vendimin, e jo për interesa të tyre të mbesin të izoluar dhe të vetmuar nga të gjithë”, thotë Krasniqi.
Ndërkaq, opinionisti Krenar Shala thotë se duke marrë parasysh gjendjen e rëndë socio-ekonomike në Kosovë, paritë politike, përfshirë edhe ato që kanë qenë në pushtet, po prezantojnë vetëm programe ekomomike dhe premtojnë se përmes tyre do të përmirësojnë jetën e qytetarëve, por sipas Shalës, edhe pas konsolidimit të qeverisë së re, temat kryesore dhe prioritare do të jenë Demarkacionit dhe Asociacioni.
“Mendoj që është lajm i gëzueshëm që partitë politike energjinë e tyre e kanë fokusuar në objektivin e përmirësimit të jetës së qytetarëve, pra: zhvillimin ekonomik, sundimin e ligjit dhe demokratizimin institucional dhe shoqëror. Megjithatë, frikohem që ky fokus nuk do të vazhdojë pas zgjedhjeve; konsideroj që partia e cila do ta marrë pushtetin nuk do të përballet me sfidat që ndërlidhen me përmirësimin e jetës së qytetarëve, por vëmendja e tyre mund të fokusohet në temat e Demarkacionit dhe Asociacionit”, theksoi Shala. /tesheshi.com/
