Personalitete të jashtëzakonshme janë të nevojshme për të lëvizur njerëzit përpara dhe për të lënë gjurmë të pashlyeshme.
Al Shafa është një prej personave të tillë të jashtëzakonshëm.
Vetëm duke e shikuar atë, njeriu fiton përshtypjen për betejën dhe mundin e saj jetësor për t’u bërë mësuese, përkundër faktit se ajo ka sindromin Down. Ajo po lë gjurmë të pashlyeshme duke mësuar nxënësit e saj në Bregun Perëndimor të Palestinës, të cilët po ashtu janë me sindromin Down.
Të jetuarit me peripeci
Njerëzit të cilët jetojnë në zonat e varfëra dhe të shkatërruara nga lufta, nuk kanë njohuri për problemet me të cilat ballafaqohen fëmijët me nevoja të posaçme me sindromin Down dhe si duhet kujdesur për këta fëmijë.
Nebeel Lajanned është drejtoreshë në fondacionin shoqata Right to Live (E drejta për të jetuar), e cila ka të regjistruar 400 fëmijë me sindromin Down, e cila u mundëson atyre një jetë produktive dhe zhvillimin e raporteve të shëndetshme me shoqërinë përreth. Al Sharfa është ish-nxënëse e fondacionit dhe tani ajo jep mësim aty.
Shkëlqimi i saj si një yll
Pavarësisht gjendjes së saj, Al Sharfa është mësimdhënëse në fondacion. Ndoshta mu për këtë arsye, ajo i kupton edhe më mirë ata, lidhet më mirë me ta dhe i udhëzon më lehtë ata. Ajo është një shembull i shkëlqyer i asaj që fondacioni synon: përfshirja e fëmijëve me sindromin Down në shoqëri.
Shoqata E drejta për të jetuar mbështetet nga Fondacioni Alwaleed, i cili punon për të siguruar objektet për nxënësit me sindromin Down, në mënyrë që ata të mund të jetojnë një jetë të suksesshme si gjithë tjerët. Gjithashtu punon edhe për të përhapur ndërgjegjësimin në mesin e njerëzve, të cilët ende nuk kanë njohuri për peripecitë e personave me aftësi të kufizuara. Ka ende shumë për t’u bërë në këtë fushë dhe shembulli i Al Sharfa ka dëshmuar të jetë hap pozitiv drejt këtij qëllimi.
Ngritja mbi pengesat
Këtë vit edhe një mësuese tjetër palestineze u bë e njohur për botën, Hanan Al-Hroub, e cila u shpërblye me 1 milion dollarë në ceremoninë e dytë të Global Teacher Award. Shpërblimi u shpall nga Papa Françesku, e iu dorëzua nga Sheiku i Dubait.
Hanan dhe Al Sharfa kanë një gjë të përbashkët, e ajo është se të dy zonjat kanë pasion mësimin dhe aftësinë për t’u adaptuar me mjedisin, si dhe zellin për të sjellë gjithëherë rezultate pozitive. /tesheshi.com/
