Ka patur një kthesë të papritur séanca e sotme ndaj të ashtëquajturit “grup të Sirisë”, të akuzuar se kanë rekrutuar individë duke i dërguar më pas në frontin e luftës në Siri. Një prej të akuzuarve, Oltion Reçi, i njohur ndryshe dhe me emrin Enes në rradhët e besimtarëve, ka kërkuar ardhjen në gjygj si dëshmitar të Sali Berishës, dora vetë, me pretendimin se pikërisht prej tij, në atë kohë kryeministër, janë frymëzuar për të bërë atë që kanë bërë, pra përpjekjet e gjithanshme për t`iu kundërvënë regjimit të Asadit.
Shtrohet pyetja nëse Berisha do ta pranojë të shkojë të dëshmojë, siç e kërkojnë të pandehurit?! Sigurisht që kjo vështirë të ndodhë.
Por ajo që bën përshtypje në këtë rast, është gjetja e formave alternative të të akuzuarve për t`u mbrojtur nga akuzat.
Së vërtet, në atë kohë kur ata janë angazhuar, qoftë dhe duke dërguar individë në front kundër regjimit të Asadit, e gjithë bashkësia ndërkombëtare qe në i referohemi në politikat tona të jashtme, ishte po ashtu kundër Asadit.
Situata atje ndryshoi më vonë me degradimin e konfliktit, zgjerimin e tij me palë të tjera ndërluftuese, si dhe shfaqjen e famëkeqit ISIS.
Dhe si duket, të akuzuarit po kërkojnë ta legjitimojnë veten për atë çfarë akuzohen, duke kujtuar se kanë qenë dhe ata në një rresht me bashkësinë ndërkombëtare, e po ashtu me qëndrimin zyrtar të shtetit të tyre.
Kjo të kujton precedentin e shumë të dënuarve në komunizëm, të cilët e pësonin vetëm prej ndryshimit të kursit politik të regjimit karshi aleatëve, që më pas i shndërronte në armiq: ai që kishte qenë pro-jugosllav, dënohej pas prishjes së marrëdhënieve me Jugosllavinë; ai që kishte qenë anti-jugosllav dhe prorus, dënohej kur prisheshin marrëdhëniet me Rusinë, e po e njëjta skemë dhe me Kinën.
Por duke iu rikthyer gjygjit të rekrutuesve për në frontin sirian, deri më tani nuk ka dalë ndonjë e dhënë që ndokush prej të rekrutuarve, të ketë përfunduar në rradhët e ISIS-it që akuzohet për terrorizëm të pastër.
Disa nga ata janë vrarë në luftime me forcat e Asadit, ende pa dalë në skenë ISIS-i, e për të tjerët që mund të jenë ende gjallë, nuk ka ende prova se janë përfshirë në akte terroriste.
Por seanca e sotme kur një prej të akuzuarve kërkon si dëshmitar Sali Berishën, të bën të mendosh se, nga zgjedhja kokëforte për të mos i njohur ligjet e këtij shteti dhe për të mos u ballafaquar me gjuhë esktra ligjore me akuzat, duke u mbrojtur dhe me avokat, ata po kërkojnë zhvlerësimin e proçesit nëpërmjet sofizmave që burojnë prej akteve politike të shtetit së cilit i përkasin. /tesheshi.com/
