Nga Bashkim Kastrati
Kohëve të fundit shohim nëpër qytetin e Prishtinës grupe të policëve kryesisht të rinj në moshë të cilët patrullojnë nëpër qytet, një praktikë e re kjo për Policinë e Kosovës. Disa grupe të policëve në përbërje prej 5 deri në 10 policë patrullojnë nëpër këmbë në gjithë qytetin. Ata ecin nëpër sheshet e Prishtinës, nëpër rrugë të ndryshme, por mund t’i shohësh edhe nëpër rrugët e lagjeve më periferike.
Ata ecin qetë, marrin ndonjë ankesë nga qytetarët, ndërsa u bie shpesh që të ndërhyjnë edhe në rastet e parkimeve të automjeteve që bëhen shpesh nëpër trotuare të kryeqytetit.
Kjo formë e re e patrullimit apo e pranisë së policisë në qytet ka zgjuar kureshtjen e qytetarëve, pasi që deri më tani nuk ka pasur një praktikë të tillë.
Në lidhje me këtë çështje tesheshi.com ka pyetur zyrën për informim të Policisë së Kosovës për të sqaruar këtë qëllimin e kësaj iniciative.
Sipas Policisë së Kosovës, qëllimi i këtyre patrullimeve është që të ofrohet siguri më e madhe për qytetarët e Kosovës dhe policët të jenë sa më të afërt me qytetarët në mënyrë që të rritet bashkëpunimi reciprok.
“Përkushtimi i vazhdueshëm i Policisë së Kosovës në ofrimin e sigurisë dhe shërbimeve për të gjithë qytetarët në Kosovë, me theks të veçantë në ofrimin e sigurisë publike, sigurinë për jetën dhe pronën, sigurinë në komunikacionin rrugor, ka bërë që të angazhohen zyrtarë policor në numër më të madh në patrullime dhe lëvizje në qytete, e më të theksuar ne kryeqytet për shkak te numrit me te madh te qytetareve qe frekuentojnë kryeqytetin”, thuhet në përgjigjen e zyrës për informim në Policisë së Kosovës.
Këta policë janë kryesisht të ri në moshë dhe të rekrutuar se fundi, ndërsa me ta dalin edhe policët me përvojë të cilët janë edhe instruktorë të tyre. Sipas policisë, kjo formë e patrullimit do të vazhdojë, ndërsa për prezencën më të madhe ose më të vogël do të vendoset varësisht nga nevoja në terren.
“Po ashtu me qellim te ngritjes se bashkëpunimit me qytetare-komunitete si dhe me qëllim te parandalimit te veprave te ndryshme kriminale dhe luftimit të të gjitha formave të krimit, PK-ja ka marrë masa shtese me shtimin e prezencës policore, kryesisht me police te gjeneratave te reja te cilët janë në teren ne mbikëqyrje edhe te instruktoreve te tyre. Policia e Kosovës varësisht prej vlerësimeve dhe nevojave do te vazhdoje me prezencën policore ne teren”, thuhet në përgjigjen e zyrës për informim në Policisë së Kosovës.
Qytetarët e mirëpresin këtë iniciativë
Qytetarët e Prishtinës thonë se fillimisht u është dukur e çuditshme një iniciativë e tillë, por pas një kohe e kanë kuptuar se kemi të bëjmë me patrullime të thjeshta që e kanë si qëllim primar ruajtjen e rëndit dhe sigurisë publike dhe që të jenë sa më afër qytetarëve.
“Fillimisht kur i kam parë në qytet rreth dhjetë policë duke ecur bashkë kam menduar se janë duke e zhvilluar ndonjë aksion apo dëshirojnë ta arrestojnë dike të fuqishëm, por pas një kohe e kam kuptuar se qëllimi nuk është ai dhe se kjo është një iniciativë e re e policisë që me qenë sa më afër qytetarëve”, thotë Rexhep Gashi, qytetar nga Prishtina.
Ndërsa, Mirjeta Hoxha thotë se prania e policëve është e mirëseardhur dhe se qytetarët kanë nevojë që ta kenë sa më afër policinë për të raportuar apo biseduar edhe për rastet më të vogla apo shqetësimet që kanë.
“Në fillim dukej disi si jo normale dhe të krijonte përshtypjen se ka ndodhur diçka, por me kalimin e kohës këto grupe të policëve janë bërë pjesë e përditshmërisë, si në sheshe ashtu edhe në rrugë dhe tashmë jemi mësuar që t’i shohim përditë dhe mendoj se kjo është një gjë e mirë, pasi që përveç se e rritë sigurinë publike, disi i afron policët me qytetarët, pasi që i shoh duke biseduar me qytetarë apo duke bërë ndonjë foto me fëmijë. Kështu që mendoj se kjo iniciativë duhet që të vazhdojë”, u shpreh ajo.
Aktualisht Policia e Kosovës ka rreth 8 mijë pjesëtarë, ndërsa rreth 4 mijë e 200 policë janë të moshës 40-vjeçare, 2901 të moshës 46-vjeçare, dhe 969 policë të moshës 55-vjeçare. /tesheshi.com/
