Kryeministri Edi Rama ka zgjedhur që mëngjesin e sotëm të bashkëbisedojë me përfaqësues të mediave, në një kohë kur nga pasditja e së hënës ka mbledhur në Llogara ministrat e qeverisë së re, takim që do të vazhdojë edhe sot.
Fillimisht Rama ka pyetur gazetarët në lidhje me pushimet, ndërsa ka pohuar se pavarësisht numrit të lartë të turistëve që vizitojnë Shqipërinë, ka shumë gjëra për t´u bërë.
“Po bëjmë një paketë të re dhe do të vendosim një rregull që kush merr vlerësim me 5 yje, të mos ketë asnjë taksë. Pork jo nuk do të lejohet më që merr marangozin dhe ngul një yll në fasadë, por duhet të çertifikohen nga organizmat prestigjoze”, tha Rama.
Po kështu ai tha se për hotelet do të vendoset me detyrim gjetja e zgjidhjes për ujrat e zeza dhe veç kësaj do të ketë investime në infrastrukturë.
“Do të bëjmë rrugën e re Llogara-Himarë, është një gjurmë shumë më turistike dhe fshatrat do të ripërtërihen konplet nga pikëpamja e infrastrukturës. Gjithashtu do të fillojmë rrugën e Thethit. Do të fillojmë rrugën Velipojë-Shëngjin nga ana e detit, dhe do të bëjmë një lidhje edhe me Malin e Zi”, tha Rama.
Në vijim ai shtoi se është e paimagjinueshme që në zonat bregdetare të mos ketë aktivitete, ndaj do të bëjmë një kalendar për të gjithë sezonin. “Çfarë ndodh sot? Dil në plazh dhe rri atje, pasi nuk ka asnjë aktivitet, vitin tjetër kjo situatë do të ndryshojë”, tha ai. /tesheshi.com/
