Nga Blendi Gashi
E filloi detyrën si zonja e parë e shtetit më 7 prill të vitit 2011, dhe e përfundon të martën e 6 prillit të vitit 2016-të.
Që nga emërimi i saj në këtë post, Atifete Jahjaga, është ballafaquar me shumë situata të pakëndshme dhe ka marrë vërejtje jo të pakta nga vet politika, shoqëria civile e mediat, për mënyrën se si është zgjedhur në këtë pozitë, por edhe mënyrën e udhëheqjes së vendit.
Jahjaga më shumë vlerësohet se ka bërë punë të mirë në arenën ndërkombëtare pasi ka marrë pjesë në shumë takime të rëndësishme. Po ashtu, dallohet nga politikanët e tjerë kosovarë pasi është një lidere ndaj së cilës nuk është drejtuar gishti për afera korruptive.
Atifete Jahjaga, nga pozita e zëvendësdrejtoreshës së policisë së Kosovës, erdhi në krye të vendit. U ul në karrigen e presidentit pas largimit të Behxhet Pacollit nga kjo pozitë.
Në vitin 2011, LDK, PDK dhe AKR ishin marrë vesh për një president njëvjeçar, por Gjykata Kushtetuese, konstatoi atë kohë se presidenti duhet t’i ketë pesë vjet.
Për pesë vjet në krye të shtetit, Jahjaga ka ndryshuar shumë. Ajo nuk është më policja që kishte një llogari bankare, një veturë ‘Golf’ e rreth 7 mijë euro kursime.
Në fund të mandatit, Jahjaga në forma të ndryshme ka rreth 100 mijë euro të shpërndara në tre xhirollogari bankare.
Jahjaga, do të gëzojë 70 për qind të pagës
Presidentja në largim, Atifete Jahjaga, edhe pas përfundimit të mandatit, do të marrë pagën në vlerë prej 70 përqind të asaj që e merr shefi i shtetit. Ajo do të ketë pagën dikur rreth 2500 euro në muaj.
Veç kësaj, Jahjaga do të ketë mundësi t’i punësojë tre persona për një periudhë pesëvjeçare derisa
Ndërkohë, Presidentja Jahjaga do të ketë përcjellje zyrtare në tri vitet e ardhshme.
Gjatë pesë viteve në Presidencë, Jahjaga ka arritur të ketë në llogari bankare më shumë se 85 mijë euro.
Privilegjet e Presidentit pasi i përfundon mandati bazuar në Ligjin për Presidentin:
Neni 19
- Presidenti i Republikës së Kosovës pas përfundimit të mandatit në pajtim me paragrafin 1. të nenit 18 të këtij ligji ka të drejtë në pension, shuma e të cilit është shtatëdhjetë përqind (70%) e pagës të cilën e merr Presidenti i Republikës së Kosovës.
- Presidenti i Republikës së Kosovës dhe familja e tij/saj pas përfundimit të mandatit në pajtim me paragrafin 1. të nenit 18 të këtij ligji kanë të drejtë në sigurim të plotë shëndetësor dhe shërbime mjekësore në spitalet ushtarake dhe publike gjatë tërë jetës.
- Presidenti i Republikës së Kosovës pas përfundimit të mandatit në pajtim me paragrafin 1. të nenit 18 të këtij ligji ka të drejtë në kompensim monetar kalimtar për një periudhë shtatë mujore të tranzicionit në jetën private. Fondet mund të përdoren për zyre, kompensim të stafit, shërbime të telekomunikacionit, shtypje dhe shërbime postare të ndërlidhura me periudhën tranzitore.
Neni 20
- Presidenti i Republikës së Kosovës të cilit i ka përfunduar mandati në pajtim me paragrafin 1. të nenit 18 të këtij ligji ka të drejtë për periudhën pesë vjeçare pas përfundimit të mandatit të tij/saj, në hapësirë zyreje, në pajisje për zyre, dhe në personel profesional të zyrës që nuk mund të jenë më shumë se tre (3) persona. Presidenti angazhohet nga Qeveria e Kosovës në aktivitete shtetërore, atëherë periudha pesë vjeçare fillon nga përfundimi i angazhimit të Presidentit.
- Personeli profesional nga paragrafi 1 i këtij neni, të drejtat e marrëdhënies së punës i realizojnë në Kabinetin e Presidentit të Republikës së Kosovës, kurse emërohen nga Presidenti të cilit i ka përfunduar mandati.
Neni 21
Presidenti i Republikës së Kosovës të cilit i ka përfunduar mandati në pajtim me paragrafin 1. të nenit 18 të këtij ligji ka të drejtë në përcjellje zyrtare për tri vjet pas përfundimit të mandatit të tij/saj, në pajtim me aktet e veçanta që i sjell Ministri i Punëve të Brendshme në bashkëpunim me Zyrën e Presidentit te Republikës së Kosovës.
