Nga Blendi Gashi
Ministri i Mjedisit, Ferid Agani, kërkoi dje nga kryeministri Isa Mustafa që ta lirojë nga detyra deri në momentin e shpalljes së pafajësisë së plotë, pas aktakuzës që është ngritur ndaj tij.
Me kërkesën e tij për lirim nga detyra, Agani tregoi se është një nga të paktët politikanë në Kosovë, që para së gjithash kanë moralin dhe jo karrigen që sjell të privilegje e para.
Por nga akte të tilla shumë larg janë zyrtarë të partive kosovare, e sidomos partia më e madhe në vend, PDK-ja.
Partia që udhëhiqet nga kryekuvendari Kadri Veseli ka me dhjetëra zyrtarë me aktakuza, të cilët vazhdojnë të ushtrojnë detyrat zyrtare. Një prej tyre është Ramadan Muja, kryetar aktual i Prizrenit.
Duke qenë se Partia e Drejtësisë e Aganit ka qenë në koalicion parazgjedhor me PDK-në është më mirë për vetë PDK-në, që të nxjerrë mësim nga veprimi i Ferid Aganit.
Analistët politikë thonë se në Kosovë është shumë pak e instaluar kultura e dorëheqjes nga politikanët dhe jo vetëm, për çka kërkojnë nga politikanët tjerë të marrin mësim nga ministri Agani.
Veprimi i Aganit, të shërbej si shembull
Analisti politik, Leon Duhanaj, thotë se në vendet me demokraci të zhvilluar, aty ku politika ka rregull, profesionalizëm e mbi të gjitha ka edhe moral, dorëheqja zë një vend shumë të rëndësishëm në shoqëri, madje trajtohet si institucion moral dhe profesional.
Sipas tij është madhështi të ofrosh dorëheqje edhe nëse ndjehesh i pafajshëm në kontekst.
Analisti Duhanaj thotë se për fat të keq, në Kosovë, akti i dorëheqjes shikohet i barabartë me fundin e botës, sepse nuk është instaluar një gjë e tillë si kulturë.
“Në Kosovë kemi përfolje e afera të përditshme, por nuk ndodhin edhe reagime me dorëheqje, sepse konsiderohet edhe si fundi i karrierës politike.
Nuk duhet harruar edhe faktin se kësaj dukurie i ka ndihmuar edhe linçimi dhe akuzat e pabazuara që u bëhen njerëzve në raste të caktuara, duke ua shkatërruar karrierën.
Për sa i përket rastit në fjalë, pa dashur të luaj rolin e gjyqtarit, mendoj që zotëria në fjalë, e posaçërisht institucioni që ai ka udhëhequr, ka kohë që përflitet për afera të rënda. Siç e dimë të gjithë çështja e sektorit të shëndetësisë është madje më e përfolura për akte korruptive, të cilat shkojnë deri në kriminalitet. Pa dashur t’i përmend aferat e shumta që kanë ndodhur në këtë sistem, ku përflitet edhe për qindra jetë të humbura si pasoj e manipulimeve. Akti i dorëzimit të mandatit, ka qenë më e pakta që ka mundur ta bëj ministri. Nuk dua të spekuloj a e ka bërë si akt moral apo ka ndodhur si pasojë e presionit politik që i është ushtruar. Por dua ta përshëndes si një hap konstruktiv i cili do duhet të shërbejë si shembull që në të ardhmen të bëhet diçka krejtësisht e rendomtë”, ka thënë Duhanaj, për tesheshi.com.
Analisti Duhanaj shpreson që dukuritë e këqija të luftohen sa më shumë dhe dorëheqja të kuptohet si një akt dhe institucion moral e profesional.
“Aty ku politika bëhet pa moral e profesionalizëm, nuk ka perspektiv për jetë normale”, thotë Duhanaj.
Dorëheqja nuk ekziston në mendjen e politikbërsve kosovarë, Aganit befasoi!
Njohësi i rrethanave politike në vend, Faik Krasniqi, thotë se në botën demokratike dorëheqja vije si akt moral, qoftë edhe për ndonjë gabim të vogël ose për ofendim.
Por, Krasniqi thotë se dorëheqja nuk ekziston në mendjen e politikëbërësve kosovarë, edhe pse shumica duhej ta kishin bërë një gjë të tillë.
“Prandaj, them të drejtën, dorëheqja e Ferid A
ganit më erdhi si befasi, sepse nuk ishim mësuar më parë që ndonjë zyrtar i lartë ka ketë bërë një gjë të tillë, pavarësisht se disa edhe janë të dënuar nga Gjykatat. Por nuk mjaftojnë vetëm dorëheqjet. Organet e drejtësisë duhet të japin dënime të rënda për gjithë të korruptuarit e politikës dhe para politikës, e deri tek konfiskimi i pasurisë. Dhe vetëm kështu mund ta bëjmë Kosovën shtet ligjor, e jo siç është duke funksionuar tash e 17 vite ku të ”fortit” e politikës dhe para politikës, të jenë mbi shtetin dhe mbi ligjin”, thotë Krasniqi, për tesheshi.com.
Ndryshe, një ndër rastet e rralla në Kosovë është dorëheqja morale e Fatmir Rexhepit, nga pozita e ministrit të Brendshëm, në vitin 2007 me rastin e demonstratës që organizoi Lëvizja Vetëvendosje në sheshin e kryeqytetit, ku nga policia rumune e UNMIK-ut mbeten të vrarë dy aktivistë të kësaj lëvizjeje, Mon Balaj dhe Arben Xheladini./tesheshi.com/
