Nga Mensur Krasniqi
Afati për dorëheqjen e Nikolla Gruevskit nga posti i kryeministrit të Maqedonisë tashmë është ngushtuar aq shumë, saqë nuk kanë mbetur as 10 ditë të plota. Pra, sipas Marrëveshjes së Përzhinos, nënshkruese e së cilës është edhe vet Gruevski, parashihet që kryeministri aktual të tërhiqet 100 ditë para zgjedhjeve parlamentare, që pritet të mbahen më 24 prill të këtij viti.
Pas qarkullimit të disa spekulimeve në opinion se Gruevski nuk do ta respektojë Marrëveshjen e Përzhinos, ai para disa ditëve hodhi poshtë këto spekulime duke konfirmuar se do të dorëhiqet para 15 janarit, mirëpo pa zbuluar se kush do të jetë pasardhësi i tij.
“Qeveri teknike do të ketë ashtu siç është e paraparë në Marrëveshjen e Përzhinos. Më 15 janar do të formohet qeveria teknike që do të organizojë zgjedhjet parlamentare, ndërsa dorëheqja ime do të jepet paraprakisht. Se kush do të jetë kandidat për kryeministër do të vendos partia dhe kështu do të informoheni”, deklaroi Gruevski.
Ndërkaq, nëpër mediumet maqedonase tashmë një kohë të gjatë kanë filluar të lakohen disa emra potencialë për zëvendësimin e Nikolla Gruevskit. Kreu i qeverisë kalimtare mund të jetë ish-ministri i Drejtësisë Mihajllo Manevski. Siç njofton PlusInfo nga burimet jozyrtare të partisë, kjo mundësi tashmë është diskutuar edhe në Këshillin Ekzekutiv të VMRO-DPMNE-së. Shpresat janë që në këtë funksion të vendoset ndonjë mik shumë i ngushtë i Nikolla Gruevskit, ku ai ka besim më të madh. I pyetur nga Plusinfo për një mundësi të tillë Manevski është përgjigjur se ai nuk kishte asnjë koment mbi këtë çështje , se a do të pranojë postin e kryeministrit për të udhëhequr qeverinë kalimtare duke organizuar zgjedhje të lira dhe demokratike.
Informacioni më i fundit i gazetares Mirka Velinovska është se kolltuku i kryeministrit po përgatitet për ministrin aktual të mbrojtjes, Zoran Jolevski.
Po nëse i lëmë anash spekulimet të llojit se kryeministri do të jetë person i besueshëm i Gruevskit dhe se do të jetë nga rrethi i tij i ngushtë, shumë pak emra deri më tani u lakuan nëpër qarqet politike. Emrat që në opinion janë përmendur më shpesh janë ai i shefit të diplomacisë, Nikolla Poposki, por edhe zëvendës- kryeministri i eurointegrimeve, Fatmir Besimi. Ky i fundit është një emër shqiptar, mirëpo shumë i dashur nga ndërkombëtarët. Gjithashtu, qarqet politike përmendin emrin e deputetit Antonio Milloshoski dhe atë të financave dhe arsimit, Zoran Stavreski dhe Nikolla Todorov.
Megjithatë, e tërë kjo është në suazat e spekulimit politik ndërsa nuk përjashtohet mundësia që edhe kjo të jetë një “grep” që të shpërqendrohet fokusi nga personi i vërtetë.
Në vazhdim portali tesheshi.com ka shkruar diçka nga biografia e kandidatëve më të mundshëm për zëvendësimin e Nikolla Gruevskit në postin e kryeministrit të përkohshëm.
Mihajllo Manevski është lindur në fshatin e Veleshtës Bashino më 26 dhjetor të vitit 1937. I diplomuar në fakultetin juridik në Shkup më 1960. Ka punuar 28 vite në Prokurorinë publike të Maqedonisë. Për 5 vite me radhë ka qenë ministër i Drejtësisë 2006-2011. Manevski gjithashtu ka punuar në përgatitjen e një numri të madh të akteve ligjore dhe nënligjore nga sfera e jurisprudencës, drejtës penale, kriminalitetit financiar dhe korrupsionit.
Zoran Jolevski është lindur më 1959 në Shkup. Është ministër aktual i Mbrojtjes në Maqedoni. Ka qenë ish ambasador i Maqedonisë në Shtetet e Bashkuara të Amerikës. Në vitin 2008 ishte zgjedhur si negociatori kryesor i çështjes së emrit për Maqedoninë. Ai ka doktoruar për ekonominë ndërkombëtare në Universitetin “Shën Qirili dhe Metodi”, në Shkup. Ka qenë edhe sekretari gjeneral i ish kryetarit të shtetit maqedonas, Boris Trajkovskit nga viti 2000-2004.
Nikolla Popovski, politikan maqedonas i lindur më 24 maj 1962 në qytetin e Shkupit. Ka diplomuar në fakultetin ekonomik në Shkup. Që nga viti 1992 deri vitin 2002 ka qenë deputet në Kuvendin e Republikës së Maqedonisë. Një vit e gjysmë (2002-2003) ka ushtruar detyrën e kryetarit të Kuvendit në Maqedoni. Më 7 nëntor të vitit 2003 u emërua si ministër i financave në qeverinë e atëhershme të Branko Cërvenkovskit, etj.
Fatmir Besimi politikan shqiptar (ekonomist) i lindur më 18 nëntor të vitit 1975 në Tetovë. Ka kaluar dy mandate si ministër i Mbrojtjes, kuadër i Bashkimit Demokratik për Integrim. Për momentin është emëruar si zëvendëskryeministër i eurointegrimeve. Në vitin 2010 është selektuar si Lideri më i ri më i mirë nga Forumi botëror ekonomik./tesheshi.com/
