Publikohet lista e personave të cilëve presidenti i shtetit maqedonas ua ka tërhequr abolimin. Në këtë listë sipas gazetës zyrtare janë përfshirë, kryetari i VMRO-DPMNE-së, Nikolla Gruevski, ai i LSDM-së, Zoran Zaev, ish-ministrat e VMRO-DPMNE-së, Mile Janakievski dhe Gordana Jankullovska, ish drejtori i DSK-së, Sasho Mijallkov, sekretari i përgjithshëm i Qeverisë, Kirill Bozhinovski, shefi i kabinetit të ish-kryeministrit Gruevski, Martin Protugjer, por edhe kryetari i PDSH-së Menduh Thaçi.
Në listën e tërheqjes së abulimit nga presidenti Ivanov, janë edhe kryetari i Kuvendit, Trajko Veljanovski, ish-kryetari i LSDM-së, Branko Cërvenkovski, ish-ministri i Bujqësisë, Luço Dimovski dhe anëtari i KSHZ-së, Bedredin Ibrahimi.
Pa abolim kanë mbetur edhe funksionarët e pushtetit lokal si kryetari i Qytetit të Shkupit, Koce Trajanovski, Irena Misheva, Toni Trajkovski, Vlladimir Talevski, Vlladimir Todoroviq, drejtori i Burgut të Idrizovës Zhivko Pejkovski, funksionari i lartë i MPB-së, Toni Jakimovski, anëtari i Komisionit komunal zgjedhor në Komunën e Çairit, Ismet Guri, ish shefi i DSK-së Zoran Verushevski dhe Branko Palifrov.
Për momentin kanë mbetur 33 persona të cilët gëzojnë falje nga presidenti Ivanov, të cilët nëse vlerësojnë se janë të pastër mund të dorëzojnë kërkesa personale për tërheqjen e vendimit për abolim nga presidenti.
Në mesin e të aboluarve kanë mbetur edhe prokuroret speciale Fatime Fetai, Lile Stefanova, Gavrill Bubevski, të cilët kanë dorëzuar kërkesë që presidenti t’ua tërheq abolimet para se ai të sjellë vendimin e djeshëm për tërheqje të pjesërishme nga abolimi. M.Krasniqi – /tesheshi.com/
