Nga Bashkim Kastrati
Qeveria Haradinaj do të mbahet mend si njëra nga Qeveritë që është varur më së shumti nga opozita, por edhe nga “Lista Serbe” përbrenda koalicionit. Duke marrë parasysh se për të miratuar marrëveshje me rëndësi për vendin, duhet dy të tretat e deputetëve të Kuvendit të Kosovës, Haradinaj do ta ketë presionin e vazhdueshëm në këtë aspekt, por edhe do të përballet me kushtëzime të ndryshme.
Kushtëzimet e para kanë ardhur në seancën e së hënës, kur shefi i grupit parlamentar të LDK-së Avdullah Hoti, ka deklaruar se nëse kryeministri Haradinaj nuk do të këtë konsideratë të mjaftueshme ndaj deputetëve opozitarë për të qëndruar në seanca që thirren nga opozita dhe për të dhënë llogari ndaj kërkesave të deputetëve, nuk do ta ketë përkrahjen e deputetëve të LDK-së.
Hoti në këtë kontekst ia përmendi Haradinajt nevojën që ka ai për opozitën së pari për të miratuar marrëveshjen e IPA-së (Instrumenti i Asistencës së Para- anëtarësimit në Bashkimin Evropian). Përmes kësaj marrëveshje Kosova pritet të përfitojë 71.5 milionë euro. Por për t’i përfituar këto para përmes arritjes së marrëveshjes e cila do të duhet të miratohet në Kuvendin e Kosovës, Haradinaj do të duhet “t’i shkojë për peri” opozitës.
Por dje, u miratua kjo marrëveshje financiare për IPA ndërmjet Kosovës dhe Bashkimit Evropian është votuar me 93 vota për, asnjë kundër, asnjë abstenim.
Këto mjete financiare do të shpërndahen në këta sektorë: Demokracia dhe qeverisja; Sundimi i ligjit dhe të drejtat themelore; Energjia; Konkurrueshmëria dhe inovacioni; Arsimi, shëndetësia dhe politikat sociale; Bujqësia dhe zhvillimi rural Mjedisi dhe Bashkëpunimi regjional.
A do t’i shkojë për “peri” Haradinaj opozitës?
Kryeministri Ramush Haradinaj do të ketë vazhdimisht nevojë për votat e VV-së dhe LDK-së, sidomos për marrëveshjet dhe ligjet që kërkojnë dy të tretat e deputetëve. Por nëse Haradinaj “nuk i jep llogari partive opozitare, ato kanë paralajmëruar se nuk do ta përkrahin Haradinajn kur atij i nevojitën votat.
“Nëse ju nuk qëndroni për të dhënë llogari si është formuar qeveria, për pazaret politike, ne nuk do të qëndrojmë për votimin e marrëveshjes IPA që kërkon dy të tretat e votave të opozitës. Kryeministri i ka injoruar 59 deputetë të opozitës. Ju ftoj që të silleni në mënyrë konstruktive, nëse jo këto janë pasojat me të cilat do të përballeni”, ka thënë Hoti.
Ai i ka kujtuar Haradinajt se pa opozitën ligjet që kërkojnë dy të tretat e votave të deputetëve për t’u implementuar, nuk do të arrijnë të realizohen, nëse sipas tij kryeministri injoron partitë opozitare.
Ky paralajmërim ka zgjuar reagimin e deputetëve të pozitës, përfaqësuesit e të cilave kanë deklaruar se kushtëzime të tilla janë të pranuara dhe se opozita duhet t’i votojë të gjitha ligjet dhe marrëveshjet për të mirën e qytetarëve, e jo t’i bllokojë ato.
Memli Krasniqi, shef i grupit parlamentar të PDK-së, ka thënë se LDK-ja nuk mund të vërë kushte të tilla si mosvotimi për Marrëveshjen IPA-së të Bashkimit Evropian.
“Kur është dashur që të mendohet për çështjet që ndërlidhen me të mirën e përbashkët, këta thanë që do të votojnë kundër program të IPA-s të Bashkimit Evropian”, tha Krasniqi, duke shtuar se mosvotimi i kësaj Marrëveshjeje është i dëmshëm për Kosovën.
Përplasjet politike nuk duhet të rrezikojnë marrëveshjet ndërkombëtare
Humbja eventuale e 71.5 milionë eurove do të ishte një goditje e madhe në aspektin ekonomik për Kosovën, por edhe një pengesë në rrugën e Kosovës drejt BE-së. Prandaj kryeministri Haradinaj do të duhet të përgjigjet në kërkesat e opozitën, gjë që nuk e bëri, ose LDK dhe mbase edhe LVV të votojnë këtë marrëveshje, pavarësisht gatishmërisë së Haradinajt karshi kërkesave të tilla.
Lulzim Beqiri ekonomist thotë se interesi i qytetarëve të Kosovës duhet të jetë mbi interesat dhe inatet partiake dhe se marrëveshje të tilla nuk duhet në asnjë mënyrë të rrezikohen.
“Mendoj që kryetari i grupit parlamentar të LDK-së nuk ka qenë i vetëdijshëm me fjalët e tij në Kuvendin e Kosovës, më shumë ka qenë një shprehje mllefi për injorimin e kryeministrit të Kosovës që po ia bënë Kuvendit, pra thjesht mendoj se LDK dhe partitë tjera opozitare edhe ato në pushtet nuk do të bëjnë një gabim të tillë. Në rast se nuk votohen këto marrëveshje sidomos ato të cilat janë nga BE-ja, kam frikë se do të humbim shumë mundësi të përfitimit të milionave dhe imazhit. Unë jam tejet optimist se asnjë parti politike nuk ka për të mos votuar sa i përket këtyre përfitimeve”, thotë Beqiri.
Ndryshe, Instrumenti i Asistencës së Para- anëtarësimit (IPA) është mjeti me të cilin BE-ja mbështet reformat në ‘vendet e zgjerimit’ me anë të ndihmës financiare dhe teknike. E përgatitur në partneritet me vendet përfituese, IPA II, përcakton një kornize të re për dhënien e ndihmës së para-anëtarësimit për periudhën 2014-2020.
Ky instrument synon reforma në kuadrin e sektorëve të paracaktuar te cilët mbulojnë fusha te lidhura ngushtë me strategjinë e zgjerimit, të tilla si demokracia dhe qeverisja, sundimi i ligjit apo zhvillimi dhe konkurrenca. IPA II promovon reforma strukturore që do të ndihmojnë në transformimin e një sektori të caktuar në përputhje me standardet e BE-së dhe lejon një asistencë më të fokusuar duke siguruar efikasitet, qëndrueshmëri dhe orientim ndaj rezultateve. Fondet e para-anëtarësimit janë një investim i shëndoshë në të ardhmen e vendeve të zgjerimi por edhe të vetë BE-së. /tesheshi.com/
