Zbulohen prapaskenat e negociatave mes Bashkimit Europian dhe Beogradit, ku njohja e Kosovës si shtet i pavarur, edhe pse nuk është futur “fjalë për fjalë”, është vendosur de facto në një dokument zyrtar.
Duke përshkruar vizitën e komisionerit Johannes Hahn në Beograd, gazeta Vecerni Novosti thekson se në negociatat e ardhshme mes Beogradit dhe Prishtinës është caktuar si prioritet “demarkacioni i kufirit” ndërmjet Republikës së Kosovës dhe Republikës së Serbisë.
Demarkacioni është një njohje de facto e pavarësisë së Kosovës, dhe i hap rrugë kundërshtimit juridik.
Siç duket, pas rastit të Krimesë, edhe Rusia e ka braktisur Beogradin, pasi i leverdis si argument precedenti i Kosovës.
Në kampionatin botëror të xhudos që u zhvillua në Kazan të Rusisë, ishte vetë presidenti rus Vladimir Putin që kërkoi vendosjen e flamurit të Kosovës pas shpalljes së Majlinda Kelmendit si kampione bote.
Por zërat në lidhje me demarkacionin janë zhvilluar jashtë pranisë së mediave, dhe zyrtarë të Beogradit janë kompleksuar, duke e mohuar këtë gjë.
Zyrtari i lartë i qeverisë serbe për Kosovën, Marko Gjuriq, tha se, “Serbia nuk do ta njohë kurrë kufirin e Kosovës. Për ne ai nuk është kufi, madje as vijë administrative. Duhet të ndryshohet Kushtetuta që të njihet juridikisht kufiri.”
Gjuriq tha për B92-shin se Beogradi duhet të diskutojë rrugët që të lehtësojë komunikimin mes njerëzve në dy vendet.
Asocacioni i Komunave ndërkaq pritet të ngrihet së shpejti, dhe Zajednica do të jetë karremi për Beogradin që të pranojë negociatat për kufirin.
Kryeministri Vuçiq kërkoi para zgjedhjeve një shtyrje të këtyre temave, pasi mund t’u jepnin vota partive nacionaliste. Kreu i qeverisë pritet t’i bëjë votat edhe për ndryshimin e Kushtetutës, por duhet të bëjë pakt me opozitën liberale të Boris Tadiqit dhe Çedomir Jovanoviqit. /tesheshi.com/
