Nga Ylli Pata
Një prokuror amerikan i FBI-së është konsulenti kryesor i Grupit Antikorrupsion që u prezantua dje në Prokurorinë e Krimeve të Rënda dhe që pritet të nisë operacionin e madh pas një jave.
I organizuar në misionin e SHBA për të ndihmuar drejtësinë shqiptare OBDAT, juristi nga përtej oqeanit ka eksperiencë në hetimet e Byrosë Federale të Hetimeve, kryesisht ndaj zyrtarëve të lartë.
Një burim diplomatik i tha tesheshi.com, se përveç prokurorit amerikan, edhe një ekip i gjerë nga vendet e Bashkimit Europian kanë asistuar prokurorët shqiptarë në një mision që pritet të fillojë tani e do të zgjasë më shumë se dy vjet.
Një vit më parë, Dinko Cvitan, njeriu që arrestoi ish-kryeministrin e Kroacisë, Ivo Sanader, erdhi në Tiranë me një mision trajnimi mbi gjurmimin e fakteve dhe përpilimin e dosjeve që do të dërgohen në gjykatë.
Në fakt, puna në Prokurorinë e Përgjthshme ka ecur paralelisht me Inspektoratin e Lartë të Deklarimit të Pasurive dhe Konfliktit të Interesit. Inspektorët e këtij institucioni kanë udhëtuar në të gjithë rrethet e vendit dhe jashtë shtetit për të gjurmuar paratë dhe pasuritë e patundshme të zyrtarëve që hetohen për korrupsion.
Mësohet se bëhet fjalë për një operacion të madh që do të shkaktojë një “uragan” i cili do të marrë me vete një numër të madh “peshqish të vegjël” të lidhur me skema korruptuese, të cilët do të tentohen të bëhen bashkëpunëtorë që hetimet të kapin më pas “peshqit e mëdhenj”, për t`i vënë nën akuzë.
Grupi Antikorrupsion është ngritur në formën e së famshmes “pool mani pulite” të Milanos, e cila drejtohej nga Antonio Di Pietro në fillim të viteve `90 në Itali.
Kjo strukturë drejtohet nga prokurori Dritan Rreshka dhe përbëhet nga: Gentian Osmani, Anisa Qilimi dhe Enkelejda Milori.
Profil
Po kush është njeriu që ka gjasa të kthehet në “Di Pietron” shqiptar?
Dritan Rreshka është i moshës 37 vjeç, me origjinë nga Librazhdi. Ka drejtuar për një kohë Task-Forcën Antikorrupsion të Durrësit e më pas është transferuar në kryeqytet ku ka drejtuar hetimet për krimin financiar dhe korrupsionin.
Është trajnuar nga Departamenti Amerikan i Drejtësisë dhe ka hartuar të vetmin tekst për krimin financiar që mësohet në Shkollën e Lartë të Magjistraturës ku dhe jep leksione.
“Manuali për hetimin e krimit financiar” është botuar në vitin 2010 me mbështetjen e projektit OPDAT, Departamenti i Drejtësisë Amerikane. /tesheshi.com/
