Gramoz Ruçi në fjalimin e parë si kryetar i Kuvendit premtoi se do të jetë garant i zbatimit të Kushtetutës dhe rregullores së Parlamentit.
Ruçi tha se do të mbështesë deputetët për të ushtruar përgjegjësitë dhe të drejtat e tyre në shërbim të Republikës, si dhe qytetarët.
“Shumica duhet të kuptopjë se fitorja e zgjedhjeve të 25 qershorit, nuk është gjithçka, por vetëm fillimi i përgjegjësisë. Mazhoranca duhet t’i shërbejë të gjithë shqiptarëve, duke theksuar se nuk është vendi për dallime partiake.
Opozita duhet të respektojë programet e saj, të vënë në plan të parë interesin kombëtar dhe atë publik. Kjo, do të sillte ligje më të mira, që duhet të vinë edhe si propozime të dy opozitave.
Opozita si shërben qeverisë, por zhvillimit të vendit dhe mirëqenies qytetare”, theksoi kreu i Kuvendit.
Në vijim ai ftoi deputetët që gjatë ushtrimit të detyrës të udhëhiqen nga i vetmi interes, ai për Shqipërinë, dhe të lenë mënjanë interesat e ngushta partiake.
Ruçi u zgjodh me 80 vota pro, 40 kundër, ndërsa 19 deputetët e LSI-së, bojkotuan në momentin e votimit të kryetarit të Kuvendit.
Ndërsa Ruçi mbante fjalën e parë si kryeparlamentar, Partia Demokratike braktisi sallën e Kuvendit dhe ju bashkua protestës që ish-të përndjekurit mbanin në ambientet e jashtme të Parlamentit, kundër zgjedhjes së Ruçit në krye të Kuvendit, për shkak të posteve që ka pasur gjatë regjimit komunist. /tesheshi.com/
