Të fitojë edhe një herë tjetër Ligën e Kampioneve dhe të mbyllë karrierën me Bajernin e Munihut. Këto janë dy ëndrrat e Franck Ribery përpara se të varë këpucët në gozhdë.
Në moshën 34-vjeçare francezi është ende një futbollist shumë i rëndësishëm për kampionët e Gjermanisë me trajnerin Carlo Ancelotti që beson shumë te aftësitë e francezit. Sezonin e kaluar pavarësisht disa dëmtimeve, Ribery zhvilloi në total 32 ndeshje me Bajernin në të gjithë kompeticionet duke realizuar dhe 5 gola. 34 vitet mbi supe peshojnë, por mosha nuk është aspak problem për francezin i cili dëshiron të japë ende kontributin e tij tek skuadra bavereze.
“Unë gjithmonë dua të luaj, jam shumë i uritur dhe gjithmonë dua të fitoj. Por në moshën që jam është normale që të kem nevojë për pushim prandaj trajneri më ka zëvendësuar në 3 nga takimet e para. Nëse Ancelotti mendon se jam ende i rëndësishëm për skuadrën unë do të jap më mirën time për t´ia shpërblyer besimin. Ai është një trajner i madh dhe ne të dy kemi marrëdhënie të shkëlqyera. Cilat janë dëshirat e mia përpara se ti jap fund karrierës? Dua të fitoj sërish Ligën e Kampioneve me Bajernin, kjo është ëndrra ime. Ideja se mund t´ia arrij qëllimit më motivon më tepër”, thotë francezi.
Franck Ribery është në fund të kontratës me Bajernin, por ai nuk e përjashton mundësinë për të rinovuar me kampionët e Gjermanisë.
“Nuk kam folur ende me drejtuesit për rinovimin. Ka akoma kohë. Do të dëshiroja ta mbyllja karrierën time me Bajernin, por nuk jam unë i vetmi ai që vendos. Do të jetë klubi që do të thotë fjalën e fundit”. /tesheshi.com/
