Nga Bashkim Kastrati
Teksa situata ekonomike në Kosovë vazhdon të mbetet e rëndë për një pjesë të madhe të qytetarëve, disa nga zyrtarët e lartë shtetëror marrin paga marramendëse në funksionet e tyre që ata kanë. Përveç pagave bazë, ata marrin edhe meditje për udhëtime të ndryshme dhe shujta.
Një pjesë e këtyre zyrtarëve që marrin rroga të larta punojnë në ndërmarrje publike, dhe institucione të pavarura. Quhen kështu të pavarura, por në fakt ato janë të mbushura me militantë partiakë dhe familjarë të politikanëve që janë apo kanë qenë në pushtet. Edhe në ndërmarrjet publike situata është e njëjtë.
Tesheshi.com do të sjellë pagat e disa prej drejtorëve të bordeve dhe kryeshefave të agjencive të pavarura të cilat ata i kanë deklaruar në Agjencinë Kundër Korrupsionit dhe të cilat janë publikuar gjatë kësaj jave.
Agron Mustafa është kryeshef ekzekutiv në Telekomin e Kosovës. Paga e tij mujore është hiq më pak se 5,182.24 euro, që i bie se brenda një viti ai merr plotë 62,186.88 euro. Agron Mustafa para se të emërohet në këtë post ka qenë edhe drejtor i Aeroportit Ndërkombëtar të Prishtinës. Ndërkaq ai ka qenë edhe pjesë e organeve të Partisë Demokratike të Kosovës.
Bedri Hamza është guvernator i Bankës Qendrore të Kosovës. Ai brenda një viti merr hiq më pak se 53,517.00 euro. Paga mujore i bie të jetë 4,459.75 euro në muaj. Gjithashtu edhe Hamza ka qenë pjesë e strukturave të PDK-së. Ai ka qenë edhe Ministër i Financave nga radhët e kësaj partie.
Adrian Zalli është drejtor menaxhues në Fondin e Kursimeve Pensionale – Trust. Paga dhe mëditjet vjetore që ai i ka deklaruar kapin shifrën e hiq më pak se 60,983.00 euro. Pra nga kjo punë Zalli merr hiq më pak se 5,081.91 euro për një muaj.
Sejdi Hoxha është kryeshef ekzekutiv në Posten e Kosovës. Paga vjetore e tij është 30,000.00 euro. Ai është i afërt me PDK-në, ndërkaq është raportuar se ka lidhje familjare edhe me Azem Sylën, ish-deputet i PDK-së.
Mustafë Hasani është kryeshef ekzekutiv në Operatorin e Sistemit të Transmisionit dhe Tregut – KOSTT. Paga dhe mëditja e tij vjetore është 43,961.88 euro.
Merita Makolli është drejtoreshë e bordit të ndërmarrjes publike Aeroporti Ndërkombëtar i Prishtinës. Paga e saj vjetore është 21,480.00 euro.
Avdullah Haxhiu është kryeshef ekzekutiv në kompaninë për menaxhimin e mbeturinave. Paga e tij vjetore është 17,640.00 euro. Haxhiu ka deklaruar se brenda një viti ka marrë edhe 1,682.00 euro shtesë për shujtë. Ai është vëllai i deputetit të PDK-së Bekim Haxhiu, i njohur ndryshe në opinion edhe si “Kamishi”.
Shaip Havolli është drejtor i Agjencisë Kundër Korrupsionit. Paga e tij vjetore është 13,890.21 euro. Ai ka deklaruar edhe të hyra vjetore nga mëditjet në vlerë prej 1,073.00 euro.
Naser Canolli është kryeshef i bordit ekzekutiv në ngrohtoren e qytetit të Prishtinës – Termokos. Paga mujore e tij është 1,600.00 euro, ndërsa ka deklaruar edhe mëditje në vlerë prej 1,000.00 euro.
Këto janë vetëm të hyrat nga puna që bëjnë, pasi që disa nga ta kanë edhe të hyra tjera të mëdha nga angazhimet tjera që kanë. /tesheshi.com/
