Bashkimi Europian dhe Kuba nënshkruan të premten marrëveshjen për normalizimin e marrëdhënieve 13 vite pas pezullimit të tyre.
Marrëveshja u nënshkrua në Havana, në kuadër të një vizite të shefes së politikës së jashtme të BE-së, Federica Mogherini. Kjo marrëveshje është rezultat i negociatave që zgjasin prej dy vitesh, ku një prej temave kryesore ka qenë çështja e të drejtave të njeriut, si një prej arsyeve që e detyruan BE-në t’i pezullonte marrëdhëniet në vitin 2003.
Mogherini do të deklaronte në ceremoninë e nënshkrimit se, “Marrëveshja shënon një fazë të re në marrëdhëniet dypalëshe, një demonstrim historik të besimit dhe mirëkuptimit të ndërsjelltë.”
Me këtë marrëveshje, BE-së dhe Kubës u jepet mundësia që të bashkëpunojnë në shumë projekte. Kuba ishte gjer të premten i vetmi vend në Amerikën Latine që nuk kishte një marrëveshje bashkëpunimi me BE-në. Sidoqoftë, marrëveshja kërkon ratifikimin nga parlamentet përkatëse.
Federica Mogherini gjeti rastin t’i kritikojë dhe sanksionet e SHBA-së ndaj Kubës, që zgjasin prej dekadash. Tërësisht të vjetëruar e ka quajtur ajo embargon amerikane. “Bllokada është një masë që i përket një tjetër shekulli. Tani përparësitë janë dialogu dhe bashkëpunimi,” u shpreh shefja e politikës së jashtme të Bashkimit Europian.
Kuba përgatitet këto ditë dhe për një ngjarje tjetër të jashtëzakonshme. Një president amerikan do ta vizitojë vendin zyrtarisht pas 88 vitesh. Barack Obama është planifikuar të jetë në Kubë më 20 mars. /tesheshi.com/
