Nga Musa Mustafa
Ka ndodhur sërish ajo që dhe muaj më parë ndodhi në Mitrovicë: një grup të rinjsh të qytetit, mbrojtës të flaktë të ambientit, nuk janë duke kursyer në fjalë të liga ndaj çdo ndotësi të mundshëm të tij, pra me qëllim që ta mbrojnë ambientin dhe gjelbërimin nga shkatërrimi prej dorës njerëzore.
Në shëtitoren e vetme të Mitrovicës, përskaj lumit “Ibër”, këta të rinj kanë vendosur disa pankarta, pikërisht me thirrje të ngarkuara me fjalë të rënda, deri dhe fyese, si
“O manjak, mjekohu e mos e shkatërro gjelbërimin”; “O shtazo, o egërsirë, pse po e shkatërron gjelbërimin” etj.
Grupi i të rinjve nuk ka dashur që të prononcohet rreth llojit të veçantë të mesazhit të përcjellë. Ndërsa qytetarë të Mitrovicës, edhe pse nuk janë dakort deri diku me gjuhën e përdorur, i vlerësojnë mesazhet e përcjella në dobi të ndërgjegjësimit të njerëzve për mosndotjen e ambientit.
“Më duket se mesazhi që është shkruar në to është tepër i rëndë, por gjithsesi po i mirëkuptoj ata që kanë shkruar këtë. Kanë të drejtë se gjelbërimi dhe ambienti po shkatërrohen nga qytetarë të pandërgjegjshëm”, ka thënë Driton Sulejmani, qytetar mitrovicas.
Ai thotë se nëse qytetarët nukduan të ballafaqohen me të tilla mesazhe, atëherë le ta ruajnë gjelbërimin, ndërsa mbeturinat t’i hedhin në vendet caktuara, siç ndodh në botën e civilizuar.
Ndërsa Besim Beqiri, lidhur me këto mesazhe ka theksuar se janë pak ato çfarë janë shkruar. “Ne i meritojmë këto mesazhe”, ka shtuar ai.
“Së paku tri herë komuna i ka vendosur koshat e mbeturinave përskaj “Ibrit”, por në të tria rastet ato janë shkatërruar nga vetë qytetarët, andaj i përkrah këto që po shkruajnë këta të rinj”, ka thënë Beqiri.
Në anën tjetër, drejtori i Kompanisë Rajonale për Menaxhimin e Mbeturinave “Uniteti”, Skender Tahiraj, i ka thënë portalit tesheshi.com me telefon se ditë më parë është njoftuar nga punëtorët e pastrimit për këto pankarta që janë vendosur përskaj lumit “Ibër”.
“Kam dalë me dy bashkëpunëtorë në vendin e ngjarjes dhe i kam parë. Kemi tentuar që t’i largojmë këto pankarta nga muri por një grup i pensionistëve që po shëtisnin andej kanë reaguar me shumë mirësjellje duke kërkuar nga ne që të mos i largojmë nga aty”, ka thënë Tahiraj.
“Është realitet i hidhur. Ne kemi shumë probleme me ruajtjen e ambientit dhe gjelbërimit. Po punojmë shumë që t’i vetëdijësojmë qytetarët që drunjtë dhe gjelbërimi të mos dëmtohenm ndërsa që mbeturinat të mos i hedhin në tokë por në vendet e caktuara”, ka thënë drejtori i “Uniteti”-t, Skënder Tahiraj. /tesheshi.com/
