Federata e Taekwandos së Kosovës përmes një komunikate drejtuar ekskluzivisht portalit ‘tesheshi.com’ ka reaguar për mospjesëmarrjen në lojërat e “Ballkaniadës” 2015 në Zrenjan të Serbisë ku kjo e fundit është organizatore.
Në letrën e FTK-së drejtuar WTF, ETU, BTU thuhet: “Shprehim shqetësimet tona të thella ndaj organizimit të Kampionatit Ballkanik të Taekwondos nga Asociacioni i Taekwondos se Serbisë dhe njëkohësisht ndaj vetë qasjes se shtetit të Serbisë.
Federata e Taekwondos së Kosovës që nga muaji maj i këtij viti është anëtare me të drejtë të plotë në WTF, ETU, BTU, gjithashtu edhe Komiteti Olimpik i Kosovës është anëtare me të drejtë të plotë në Komitetin Olimpik Ndërkombëtar.”
Po ashtu theksohet se tri ditë para fillimit të kampionatit FTK është informuar zyrtarisht nga Asociacioni i Taekwondos se Serbisë, se Kosovës nuk i lejohet pjesëmarrja me të drejta të plota duke mos u prezantuar me simbole, flamur e himn e që janë të garantuara këto me statutin e IOC, WTF, ETU dhe BTU dhe njëherësh sportistëve nuk u sigurohen kushtet elementare për një organizim siç është siguria.
“Për këto arsye Federata e Taekwondos së Kosovës me dëshirën më të madhe për të marrë pjesë në garat ndërkombëtare por mbi bazën e shqetësimeve të lart cekura ku nuk ka siguri elementare për sportistët nga Republika e Kosovës dhe nuk u mundësohet pjesëmarrje e barabartë, ka marrë vendim që të mos i lejoj sportistët e saj të marrin pjesë në një “kampionat” me këtë lloj organizimi që do të mbahet nesër nga Asociacioni i Serb i Taekwondos,” thuhet në reagimin e FTK-së transmeton portali ‘tesheshi.com’.
