Prokuroria e Përgjithshme ka njoftuar regjistrimin zyrtar të ministrit të Rendit, Saimir Tahiri, si i hetuar, pra kandiat për i “pandehur”.
Më pak se dy javë më parë, tesheshi.com botoi disa shkrime ku bënte të ditur se kryeprokurori e ka gati mandatin ndaj Tahirit dhe tashmë ka nisur një përplasje e madhe brenda shtetit.
Siç bën të ditur Prokuroria e Përgjithshme, “Regjistrimi i këtij procedimi për Tahirin vjen pas kallëzimit të bërë nga Këshilli i Lartë i Drejtësisë për intimidimin e gjyqtarit Arjan Aliaj”.
Aliaj dha vendimin për pezullimin nga detyra të kreut të Policisë së Shtetit, Haki Çako, si dhe arrestin me burg për kryebashkiakun e Kavajës, Elvis Rroshi, masë të cilën e ndryshoi tre ditë më vonë në “arrest shtëpie”.
Pas këtij veprimi, prokuroria do të thërrasë Tahirin me cilësinë e “personit nën hetim”, me anë të një shkrese që me postë sekrete do të mbërrijë në selinë e Gardës së Republikës, ku ndodhen zyrat e Ministrisë së Brendshme provizorisht.
Pas mbërritjes së kësaj shkrese, Saimir Tahiri, do të duhet të shkojë në prokurori me një avokat si “i pandehur”; e nga ana tjetër, ose prokuroria do t’i kërkojë Gjykatës së Tiranës të miratojë një vendim për arrestim ndaj ministrit të brendshëm, ose do t’i kërkojë si në rastin e Haki Çakos, “pezullim nga detyra”, që në këtë rast nuk mund ta bëjë gjykata, pasi qeveria zgjidhet nga një organ sovran siç është Kuvendi.
Arresti është mekanizmi më i mundshëm, duke pasur parasysh se Tahiri nuk është edhe deputet.
Por çështja nuk është kaq e thjeshtë pasi denoncimi i KLD-së ndaj Tahirit i heq këtij institucioni atributet e një organi të paanshëm dhe e kthen si sindikatë, pra lehtësisht të sulmueshëm.
Nëse Saimir Tahirit do t’i pritet fleta e arrestit nga gjykata, sipas të gjitha të dhënave bëhet e ditur se do të ndodhë e njëjta gjë si me gardistët pas 21 janarit: policia nuk do të pranojë të ekzekutojë vendimin. Madje do të ndërmarrë një operacion edhe më të fortë se deri tani.
Pikërisht ditën e sotme, policia ka arrestuar Vladimir Gjutën, personin që ka denoncuar në polici për çështjen e përgjimit dhe për të cilin akuzohet Ministria e Brendshme se ka marrë numrin imei-t të celularit.
Arrestimi i Gjutës është bërë “për dhunë ndaj të atit”, një akuzë paksa jo shumë e bindshme, por që tregon se lufta mes institucioneve ka nisur dhe në ditët në vazhdim do të jetë egërsisht e pranishme në format më demonstrative… /tesheshi.com/
