Protestës të së shtunës më 18 shkurt, Partia Demokratike i ka shtuar një element misteri, faktin atë që ditë do merret një vendim i madh. E tha këtë vetë Basha në një gjendje deliri politik, teksa po takohej me banorë të një zone në Tiranë, pjesë e një turi për të riaktivizuar elektoratin për protestën e pritshme. Dhe, duke e nisur fjalinë e tij me frazën klasike të Berishës, “ju garantoj”, i zgjedhuri i tij në krye të PD-së tha: “Ju garantoj se së bashku do të marrim një vendim që do të hyjë në histori si një nga vendimet më të mëdha të popullit shqiptar për t’u hapur rrugën zgjedhjeve të lira e të ndershme dhe përmes zgjedhjeve të lira e të ndershme ta kthejmë qeverisjen tek zotërit e vet, që janë qytetarët shqiptarë”.
Por ç’të jetë vallë ky vendim, që mbi të gjithë i është atribuuar të gjithë shqiptarëve, pra, ku janë përfshirë brenda dhe ata që janë pjesë e elektoratit të PS-së?
Mos është fjala për hyrjen në ndonjë grevë urie para kryeministrisë, ngjashëm siç bëri dhe Rama me të tijtë pranverën e 2010-ës për hapjen e kutive? Jo, aspak.
Burime të tesheshi.com brenda SHQUP-it bëjnë me dije se është fjala për shpalljen e bojkotit të zgjedhjeve. Kjo nuk është definitive, por e kushtëzuar nga pjesëmarrja në protestë. Nëse ajo do jetë e madhe, pra, aq sa krerët e PD-së ta ndjejnë veten të motivuar për vendimmarrje të guximshme, do shpallet se nuk do shkohet në zgjedhje me Edi Ramën. Por deri këtu nuk ka asgjë të pazakontë. Siç është nuhatur, opozita e gatuan prej kohësh këtë tezë. Ajo që veçohet në këtë qëndrim ende të pashpallur por të bërë gati, është se në krah të PD-së do jetë dhe një segment i mazhorancës, më saktë LSI, që do e mbështesë një thirrje të tillë.
Kujtojmë që dhe gjatë të qënit të PS-së në opozitë e PD-së në pushtet, para 23 qershorit, Rama e kërkonte me ngulm mosshkuarjen në zgjedhje me Berishën kryeministër; por kjo nuk u bë kurrë realitet sepse zgjidhja erdhi nga aleanca me LSI-në. Deri para 1 prillit, Rama druhej të shkonte në zgjedhje me Berishën në krye të qeverisë, pra dhe shtetit; por pas kësaj date Rama u sigurua që fitorja mund të vinte dhe pa luajtur Berisha nga vendi. /tesheshi.com/
