Disa orë përpara se kryeministri Edi Rama të shpallë kabinetin qeveritar, Brukseli kërkon që fokusi të jetë te zbatimi i reformës në drejtësi, e në mënyrë specifike te vettingu.
Zëdhënësja e Bashkimit Europian, Maja Koçijançiç, thekson se BE pret nga qeveria Rama2, zbatimin e reformës në drejtësi, luftën kundër drogës, si dhe adresimin e çështjes se azilkërkuesve.
“Tani ne presim një qeveri të angazhuar fort për të çuar vendin përpara në rrugën e integrimit përmes përpjekjeve të qëndrueshme për reforma”, tha ajo për Vizion+.
Sipas Koçijançiç, qeveria e re, veçanërisht, duhet të përqendrohet te zbatimi i reformës në drejtësi dhe procesit të vetingut, i cili është thelbësor në luftën kundër krimit të organizuar dhe korrupsionit.
“Gjithashtu duhet të fokusohet në mënyrë më efektive në luftën kundër trafikut dhe kultivimit të drogës, dhe përtej kuadrit të 5 prioriteteve kyçe, të trajtojë edhe çështjen e aplikimeve dukshëm të pabazuara për azil nga qytetarët shqiptarë në vendet anëtare të BE dhe në vendet që janë pjesë e Shengenit”, tha Koçijançiç. /tesheshi.com/
