Mijëra izraelitë kërkuan ndryshimin e qeverisë në protestën më të madhe të zhvilluar gjatë muajve të fundit në Tel-Aviv. Protesta, që mblodhi 30.000 të pakënaqur me qeverisjen aktuale, u zhvillua në sheshin Rabin. Në mes të pranishmëve spikaste banderola ku shkruhej, “Izraeli kërkon ndryshim më 17 mars”. Manifestimi u zhvillua vetëm pak ditë para zgjedhjeve të përgjithshme, dhe atij iu bashkuan një numër i madh i anëtarëve të partisë majtiste Meretz, e cila inkurajon paqen midis izraelitëve dhe palestinezëve.
Meir Dagan, një ish-shef i MOSSAD-it, shërbimit të fshehtë izraelit, e mori fjalën gjatë protestës, duke thënë se, “Izraeli nuk ka qenë në gjendje kaq të keqe që prej krijimit të tij. Netanyahu nuk mori asnjë iniciativë për një të ardhme më të mirë në gjashtë vite si kryeministër.” Dagan-i e fshikulloi Netanyahu-n për dështimin për të bërë paqe me palestinezët. Ai tha se nuk dëshironte që Izraeli të kthehej në një “shtet aparteidi”, apo të mbahej peng prej frikës.
Zgjedhjet e përgjithshme në Izrael zhvillohen më 17 mars, dhe në to marrin pjesë 11 parti. Sipas sistemit aktual, Izraeli është i tëri një zonë zgjedhore, dhe votohet për listat partiake, jo për kandidatë të veçantë. Parlamenti përbëhet nga 120 të zgjedhur, dhe për krijimin e qeverisë kërkohet votat e 61 prej tyre. /tesheshi.com/
