Lejet e hyrjes për 83.000 palestinezë të Bregut Perëndimor gjatë muajit të Ramazanit janë pezulluar pas një sulmi në Tel-Aviv që la të vdekur katër persona.
“Të gjitha lejet për Ramazan, veçanërisht lejet për vizita familjare nga Judea dhe Samaria për në Izrael, janë ngrirë,” u njoftua në një deklaratë të COGAT-it, njësisë që merret me çështjet civile në Bregun Perëndimor.
Nga ky vendim do të preken dhe 200 banorë të Gazës, që kanë marrë leje për t’i vizituar të afërmit gjatë muajit të Ramazanit, e që gjithashtu do t’i kenë të ngrira këto leje. Veç kësaj, ata nuk do të mund të kryejnë falje në xhaminë el-Aksa në Jerusalem.
Janë pezulluar dhe lejet izraelite të punës për 204 të afërm të kryerësve të sulmit të mbrëmshëm, si dhe nuk lejohen hyrjet e daljet në fshatin e tyre në Bregun Perëndimor.
Vendimi për pezullimin e lejeve të hyrjes pritet ta shtojë tensionin e pranishëm prej muajsh mes izraelitëve dhe palestinezëve.
Vrasja e katër personave dhe plagosja e pesë të tjerëve në kryeqytetin e Izraelit ishte më i përgjakshmi i kohëve të fundit. /tesheshi.com/
