Policia izraelite edhe një herë tjetër do t’i ndalojë besimtarët muslimanë meshkuj nën 50 vjeç ta falin namazin e xhumasë në xhaminë el-Aksa.
Në njoftimin e dhënë një ditë më parë thuhet se, “Eshtë vendosur të kufizohet mosha e adhuruesve që lejohen të hyjnë në Malin e Tempullit me meshkujt mbi 50 vjeç.” Hebrenjtë e quajnë Mali i Tempullit vendndodhjen e kompleksit të xhamisë el-Aksa.
I njëjti njoftim policor bën me dije po ashtu se do të lejohet hyrja e femrave të çdo moshe.
Kufizimi vjen si rezultat i tensioneve të shtuara gjatë ditëve të fundit në Bregun Perëndimor dhe në el-Kuds.
Përplasjet mes izraelitëve dhe palestinezëve u bënë më të dendura pasi Izraeli shpalli zgjerimin e një projekti ngulimi, që përfshin ngritjen e ndërtimeve të mëdha në atë zonë, dhe shtimin e numrit të kolonëve hebrenj në territoret e pushtuara.
Të hënën e shkuar një i ri palestinez humbi jetën në përplasjet me ushtarët izraelitë në Bregun Perëndimor. Gjatë ditëve të shkuara janë plagosur e kanë humbur jetën një numër i konsiderueshëm civilësh. /tesheshi.com/
