Kryeministri izraelit Benjamin Netanyahu e ka hedhur poshtë dje një iniciativë për paqe të Francës. Në bisedimet me homologun e tij francez, Manuel Valls, ai ka propozuar në vend të kësaj bisedime të drejtpërdrejta në Paris me presidentin palestinez, Mahmoud Abbas.
Sipas iniciativës franceze, përfaqësues të 20 vendeve do të mblidhen në kryeqytetin francez më 3 qershor për të planifikuar një konferencë të madhe paqeje në vjeshtë, si një përpjekje për të zgjidhur konfliktin izraelito-palestinez. Si izraelitët dhe palestinezët nuk janë thirrur në këtë takim të parë.
Netanyahu është shprehur kundër kësaj iniciative, duke deklaruar se ajo do t’u japë mundësi palestinezëve t’i shmangin bisedimet e drejtpërdrejta, si dhe dikton përfundimin e procesit.
Ndërkaq, palestinezët nuk kanë pranuar të ulen në bisedime të drejtpërdrejta në Paris nën patronazhin e Francës.
“Negociatat e drejtpërdrejta në të shkuarën me Netanyahu-n kanë rezultuar të jenë të pafrytshme. Pse të përsërisim të njëjtat gabime?”, ka thënë Jamal Dajani, drejtori i komunikimit për kryeministrin e Autoritetit Palestinez, Rami Hamdallah.
“Veprimet flasin më zëshëm se fjalët. Veprimet e Netanyahu-t kanë treguar se ai është më tepër i interesuar për ndërtimin e ngulimeve ilegale, sesa për arritjen e paqes,” ka shtuar Dajani.
Kryeministri francez takohet këtë paradite në Ramallah me kryeministrin e Autoritetit Palestinez, Rami Hamdallah-un. Shefi i qeverisë franceze është në një vizitë treditore në Izrael dhe në territoret palestineze. /tesheshi.com/
