Izraeli njoftoi të martën për ndërtimin e 3.000 njësive të banimit për kolonët në Bregun Perëndimor, një territor i pushtuar.
Ministria izraelite e Mbrojtjes tha përmes një njoftimi se ministri i Mbrojtjes, Avigdor Lieberman, dhe kryeministri Benjamin Netanyahu kishin vendosur të autorizojnë ndërtimin e 3.000 njësive të reja të banimit në Bregun Perëndimor, duke përdorur termin izraelit për këtë territor palestinez, të pushtuar që nga viti 1967.
Që prej hyrjes së Donald Trump-it në Shtëpinë e Bardhë, ky është i katërti njoftim i qeverisë izraelite për ndërtim të banesave të reja për kolonët.
Izraeli ka miratuar ndërtimin e 566 njësive të reja të banimit në tre zona ngulimesh në Jerusalemin Lindor, si dhe ka njoftuar për ngritjen e 2.500 të tjerave në Bregun Perëndimor.
“Ne jemi duke ndërtuar dhe do të vazhdojmë të ndërtojmë,” tha Netanyahu me zë sfidues javën e shkuar duke iu referuar miratimit të ngulimeve të reja.
Ndërtimet, në kundërvënie ndaj ligjit ndërkombëtar, kanë marrë hov pas nisjes së punës së administratës së Trump-it, e të frenuara gjatë qeverisjes së Obama-s, që pati paralajmëruar se ato do ta dëmtonin rëndë perspektivën për një zgjidhje me dy shtete në konfliktin izraelito-palestinez. /tesheshi.com/
