Izraeli ka njoftuar se do të vendosë një bllokadë “të plotë” në Gaza, duke përfshirë ndalimin e ushqimit, energjisë elektrike, ujit dhe karburantit për popullatën palestineze në zonë.
Ministri izraelit i Mbrojtjes Yoav Gallant njoftoi një “rrethim total” të Gaza-s, duke thënë se autoritetet do të ndërpresin energjinë elektrike dhe do të bllokojnë hyrjen e ushqimit dhe karburantit.
Gallant e përshkroi këtë veprim si pjesë të luftës kundër Hamasi, raporton Al Jazeera.
“Po vendosim një rrethim të plotë të Gaza-s… Pa energji elektrike, pa ushqim, pa ujë, pa gaz, gjithçka është e mbyllur”, tha Gallant në një deklaratë video, duke iu referuar enklavës të cilësuar si “burgu më i madh natyror” në botë ku jetojnë 2.3 milionë njerëz.
Izraeli dhe Egjipti kanë vendosur nivele të ndryshme bllokadash në Gaza që kur Hamasi mori pushtetin nga forcat rivale palestineze në vitin 2007.
Më herët, zëdhënësi i Hamasit Abdel-Latif al-Qanou i tha Associated Press me telefon se luftëtarët e Hamasit vazhduan luftimet jashtë Gaza-s dhe kapën më shumë izraelitë të hënën në mëngjes.
Ai tha se grupi synon të lirojë të gjithë të burgosurit palestinezë të mbajtur nga Izraeli.
Rripi i Gaza-s kufizohet me Izraelin në veri dhe lindje, me Detin Mesdhe në perëndim dhe me Egjiptin në jug. Është një territor i ngushtë prej 360 kilometrash katrorë, 41 kilometra i gjatë dhe gjashtë deri në 12 kilometra i gjerë.
Dy milionë palestinezë jetojnë në Rripin e Gaza-s, ose pothuajse 6,000 banorë për kilometër katror, që është një nga dendësia më e lartë e popullsisë në botë. /tesheshi.com/
