Izraeli tha se ekzistonte një “mundësi e madhe” që gazetarja e Al Jazeera-s, Shireen Abu Akleh të ishte “goditur aksidentalisht” nga zjarri i ushtrisë izraelite, por shtoi se nuk do të nisë një hetim.
Zyrtarët izraelitë publikuan të hënën rezultatet e hetimit të tyre për vrasjen. Dëshmitarët, Al Jazeera, hetime të shumta nga Kombet e Bashkuara, grupet e të drejtave të njeriut dhe media deklaruan se Abu Akleh u vra nga një ushtar izraelit.
Në gjetjet e hetimit izraelit thuhet se ushtarët izraelitë u gjendën në mes të zjarrit të luftëtarëve palestinezë, një pretendim që nuk përputhet me pamjet nga vendi i ngjarjes.
“Nuk është e mundur të përcaktohet pa mëdyshje burimi i të shtënave në të cilat Abu Akleh u qëllua dhe u vra“, thuhet në raport, duke shtuar se “mundësia” mbetet që ajo “të jetë goditur nga plumbat e gjuajtur nga sulmuesit e armatosur palestinezë”.
“Pas një hetimi të gjerë të ngjarjes dhe bazuar në të gjitha konstatimet, kryeprokurori ushtarak konstatoi se në rrethanat e rastit nuk dyshohet për kryerjen e veprës penale që justifikon fillimin e hetimit të policisë ushtarake”, thuhet në raport.
“Nëse e bëri, e bëri gabimisht”
Në një konferencë të shkurtër për shtyp para shpalljes së rezultateve, zyrtarë të lartë të ushtrisë izraelite thanë se ishin takuar me ushtarin dhe se “nëse ai e bëri atë, e bëri gabimisht”.
Ata kanë përsëritur disa herë se janë “shumë krenarë për sjelljen e ushtarëve”, dhe se ushtarët “ishin të informuar dhe kanë vepruar në përputhje me procedurat”.
Ky veprim i Izraelit vjen pothuajse katër muaj pas vrasjes së gazetares Shireen, më 11 maj, ndërsa ajo raportonte për inkursionin e ushtrisë pushtuese në qytetin e Jeninit, në Bregun Perëndimor verior.
Ushtria izraelite ka refuzuar të marrë përgjegjësinë për vrasjen e gazetares Abu Akleh, pasi fillimisht pretendoi se ajo u vra nga persona të armatosur palestinezë.
Megjithatë, sipas koordinatorit amerikan të sigurisë, Barak Ravid, të shtënat “të paqëllimta” nga pozicionet izraelite mund të jenë përgjegjëse për vdekjen e Shireen Abu Akleh.
Dënimi palestinez
Palestinezët e dënuan këtë vlerësim, duke akuzuar Uashingtonin se mban anën e Izraelit. Presidenti amerikan Joe Biden premtoi në korrik se Shtetet e Bashkuara do të punojnë për të mbështetur një hetim të pavarur për vrasjen e gazetares së Al Jazeera-s. Sekretari amerikan i Shtetit Anthony Blinken bëri thirrje që ata që janë përgjegjës për vrasjen e Shireen të sillen para drejtësisë.
Gjashtë hetime në terren, përfshirë ato të katër mediave të njohura amerikane, konfirmuan se të shtënat që vranë Shireen erdhën nga pozicionet e pushtuara nga forcat pushtuese në Jenin.
Një hetim i Al Jazeera-s zbuloi një foto të plumbit që vrau gazetaren, me ekspertët ushtarakë që theksuan se ishin përdorur plumba antitank. /tesheshi.com/
