Parlamenti izraelit miratoi ditën e djeshme me 60 vota pro e 52 kundër një projektligj që legalizon rreth 4.000 njësi banimi të kolonëve të ndërtuara në tokat e pushtuara palestineze, në Bregun Perëndimor.
Ligji i ri do t’i japë mundësi Izraelit të legalizojë tokat e rrëmbyera palestineze mbi të cilat izraelitët ndërtojnë pa e ditur se është tokë private apo sepse shteti i tyre i lejon ta bëjnë këtë gjë.
Organizata për Çlirimin e Palestinës reagoi menjëherë pas miratimit të projektligjit në parlamentin izraelit, duke deklaruar se ligji ishte një mjet për të legalizuar vjedhjen, ndërsa demonstronte në të njëjtën kohë vullnetin e qeverisë së Izraelit për të shkatërruar çdo mundësi për zgjidhje politike.
“Ky ligj do ta bëjë vjedhjen një politikë zyrtare izraelite,” u shpreh zëdhënësi i një organizate joqeveritare.
B’Tselem, një grup i njohur në mbrojtje të të drejtave, tha se ligji provonte që Izraeli nuk kishte asnjë synim për t’i dhënë fund kontrollit mbi palestinezët apo vjedhjes së tokave të tyre.
Ligji shihet si një tjetër hap drejt aneksimit më së paku të pjesshëm të Bregut Perëndimor. Sipas ligjit ndërkombëtar, të gjitha ngulimet janë ilegale. /tesheshi.com/
