Forcat e ushtrisë së sapoformuar siriane nuk do të lejohen të lëvizin në territorin në jug të kryeqytetit Damask, thotë kryeministri izraelit.
“Ne nuk do të lejojmë që forcat e Hay’at Tahrir al-Sham apo ushtria e re siriane të hyjnë në territoret në jug të Damaskut. Ne kërkojmë çmilitarizimin e plotë të Sirisë jugore, në provincat e Quneitra, Daraa dhe Sweida.
Ne nuk do të tolerojmë asnjë kërcënim për komunitetin Druz në Sirinë jugore”, tha Netanyahu.
Druzët janë pakicë në Siri, si dhe në Izrael, tip bektashinjsh.
Ushtarët izraelitë do të qëndrojnë në malin Hermon dhe në zonën tampon në lartësitë e pushtuara të Golanit “për një kohë të pacaktuar”, shtoi Benjamin Netanyahu. Ai gjithashtu bëri thirrje për “çmilitarizimin e plotë të Sirisë jugore nga trupat e regjimit të ri sirian”.
Izraeli dhe Siria nënshkruan një marrëveshje armëpushimi në 1974 që përcaktonte se Lartësitë e Golanit do të ishin një zonë tampon e çmilitarizuar. Por menjëherë pas rënies së Bashar al-Assad, ushtria izraelite u zhvendos në zonën tampon. /tesheshi.com/
