Pas katër muajsh vonesë, Izraeli do ti paguajë autoriteti palestinez 473 milion dollarë, shumë që përbën një nga burimet kryesore financiare për Palestinën.
“Për të ruajtur stabilitetin politik në rajon si dhe për arsye humanitare, Izraeli ka vendosur të kryejë transferimin e të ardhurave tatimore që janë mbledhur në emër të Autoritetit Palestinez,” -tha një burim anonim për Radion Izraelite.
Izraeli do të transferojë fondet në shumën prej 1,85 miliardë sikla izraelite (rreth 473 milion dollarë amerikan). Të shtunën, ministri i Punëve Civile të Palestinës, Hassan el-Sheikh, tha se Izraeli, të dielën ose deri të hënën, do të kryejë transferimin e fondeve që i përkasin Palestinës.
Një ditë më parë, Kryeministri palestinez Rami Hamdallah kishte thënë se Izraeli kishte rënë dakord për pagesën e të gjitha fondeve të mbledhura nga të ardhurat tatimore. Izraeli në katër muajt e fundit, që kur Presidenti palestinez Mahmud Abbas aplikoi për anëtarësim e Palestinës në Gjykatën Ndërkombëtare Penale, ka mbajtur fondet e mbledhura në emër të Palestinës në territoret e tyre. Këto fonde janë një nga burimet kryesore financiare të Palestinës. Gjatë kohës që transferimi i fondeve në fjalë është ndërprerë pagat në sektorin publik palestinez nuk janë paguar të gjitha.
