Një përplasje e fortë ka ndodhur në një debat televiziv të drejtpërdrejtë mes dy zyrtarëve të lartë të Bosnjës dhe Serbisë.
Beqir Izetbegoviç, anëtari i presidencës së Bosnjë-Hercegovinës, e ka akuzuar kryeministrin e Serbisë, Aleksandër Vuçiç, se ende e mohon gjenocidin e Srebrenicës.
“Ai e mohon gjenocidin. Ne nuk jemi në kërkim të një rishikimi politik, por për të pranuar të vërtetën,” ka thënë djali i ish-presidentit legjendar të Bosnjës, Alija Izetbegoviçit, gjatë një interviste për televizionin N1, ku ishte i ftuar së bashku me kryeministrin serb, i cili gjendej në Sarajevë për një mbledhje të përbashkët të dy qeverive.
Vuçiç deklaroi se Serbia i ka dënuar “krimet e rënda dhe të urryera të Srebrenicës”, e se për këtë qëllim janë arrestuar 14 persona.
Kryeministri serb ka theksuar më tej se ai vetë ka shkuar të bëjë homazhe te viktimat e Srebrenicës, dhe si kryeministër nuk e ka pranuar asnjëherë cilësimin “gjenocid”.
“Që kur jam emëruar në postin e kreut të qeverisë nuk kam thënë asnjëherë që ka qenë apo nuk ka qenë gjenocid, pasi nuk dua t’i shkaktoj dhimbje asnjërit prej boshnjakëve të lënduar nga lufta,” ka thënë Vuçiç.
Ky i fundit, duke komentuar deklaratën e tij në vitin 1995, kur ishte numri dy i Partisë Radikale (SRS), se për një serb do të vrasë 100 myslimanë, u shpreh se ajo është marrë jashtë kontekstit.
Sipas Vuçiçit, ai nuk ka thënë asnjëherë diçka të tillë: “Unë edhe kam gabuar, por jam i sinqertë kur them se kam mbrojtur gjithmonë interesat e popullit tim; dhe ata mendojnë se marrëdhëniet ndërmjet serbëve dhe boshnjakëve janë shumë të rëndësishme. /tesheshi.com/
