Kroati, që ka luajtur në vitet e para të këtij dhjetëvjeçari te Bajerni i Mynihut, është ndalur të flasë për eliminimin e ish-ekipit të tij në gjysmëfinalet e Champions League-s.
Olic e ka parë dhe e ka cilësuar si dështim eliminimin e Bajernit nga Atletiko e Madridit, eliminimi i tretë i njëpasnjëshëm në të njëjtën fazë të aktivitetit europian. Dhe për të, përgjegjësi është Guardiola.
“Guardiola u eliminua në tre gjysmëfinale radhazi të Champions League-s, dhe për standardet e larta të Bajernit, ky është një dështim,” ka thënë Ivica Olic.
Një prej lojtarëve me peshë në kohën e tij, ai deklaron se Guardiola nuk do të mbahet mend te Bajerni, edhe pse mund të ketë fituar shumë tituj në nivel kombëtar. Thumbimi i tij shtohet duke sjellë në vëmendje sukseset e Heynckes-it, trajnerit që e drejtoi Bajernin para spanjollit.
“Guardiola u kap pas filozofisë së tij dhe dështoi të fitonte një titull europian, ndonëse që nga fillimi do duhej të përballonte barrën e pritshmërive. Ai erdhi pas Heynckes-it, që i fitoi të gjitha, e kësisoj Guardiola veç do duhej ta ndiqte suksesin e tij. Por nuk ia doli, dhe nuk do të kujtohet.”
Por çfarë ka thënë vetë Guardiola orë më parë, pas eliminimit nga Atletikoja? “Titujt janë thjesht numra, statistika. A është ky zhgënjimi më i madh i karrierës sime? Jo! Ju jeni të zhgënjyer kur nuk luani mirë. Gjëja më e rëndësishme është se ky klub ka një të ardhme të madhe, me lojtarë të mëdhenj dhe me një mentalitet të madh.” /tesheshi.com/
