Kur të gjithë mendonin se me paralajmërimin e një konference të jashtëzakonshme, presidenti i shtetit maqedonas Gjorgje Ivanov do të tërheqë vendimin për amnisti të funksionarëve politikë në Maqedoni të involvuar në kryerjen e veprave penale, ai vetëm ripërsëriti qëndrimin e tij.
Pra ishin të kota të gjitha ankesat, si të partive politike të cilat asnjëra nuk ishin të kënaqura me vendimin e Ivanov për amnisti, ashtu edhe të analistëve politik e deri te komuniteti ndërkombëtar.
Ivanov jo vetëm se nuk e tërhoqi vendimin për amnisti, ai njëkohësisht paralajmëroi të gjithë ambasadorët e huaj në Maqedoni që të kenë kujdes me deklaratat e tyre ngaqë mund të keqkuptohen.
Deri tani askush nuk është i kënaqur nga vendimi i presidentit Ivanov për amnisti. Partia maqedonase në pushtet VMRO-DPMNE vlerësojnë se nuk duhet amnistohet kryetari i LSDM-së opozitare, Zoran Zaev, ndërsa LSDM janë kundër që të amnistohen 56 funksionarë të lartë shtetëror të pushtetit aktual që janë zhytur thellë në kriminalitet, gjë që ka sjellë deri te kjo krizë e thellë politike.
Me këtë vendim të presidentit Ivanov dhe shpalljen zyrtare të zgjedhjeve të parakohshme parlamentare më datë 5 qershor nga ana e kryetarit të Kuvendit, Trajko Veljanovski, opozita e bashkuar në Maqedoni kanë paralajmëruar atw qw e auan protestën më të madhe që do ta shkruajë historia e Maqedonisë, kundër kriminelëve që për interesat e tyre personale dëshirojnë ta dërgojnë shtetin në humnerë.
Protesta është paralajmëruar që të fillojë nga ora 18:00, ndërsa rrugët e Shkupit tashmë veçse janë të bllokuara nga numri i madh i forcave policore.
Nuk dihet nëse kësaj proteste në momentin e fundit do t’i bashkangjiten edhe partitë opozitare shqiptare.
Deri tani vetëm përfaqësues të partisë politike shqiptare UNITETI kanë marrë pjesë në protestën e organizatave joqeveritare para dy ditësh. /tesheshi.com/
