Një ndër zërat jo pa rëndësi rajonalë, presidenti i Maqedonisë, Gjorge Ivanov, është pozicionuar kundër idesë për ndryshim kufijsh mes Serbisë dhe Kosovës – korrigjim, siç i cilëson presidenti Thaçi, duke thënë kjo mund të ketë efekte negative zinxhir.
“Në Ballkan sërish po bisedohet për korrigjim të kufijve, për shkëmbim të kufijve dhe të popullatës. Sikur po harrohet mësimi se çdo plan për korrigjime të kufijve në Ballkan shkakton reagim negativ zinxhiror. Precedentët në Ballkan janë shfrytëzuar dhe do të shfrytëzohen për qëllime tjera në Evropën Lindore, Kaukaz, Lindjen e Afërt, Afrikën Veriore. Këto janë sfida serioze që kërkojnë investime serioze. Për këtë qëllim, investimi në mbrojtje është interes, të cilin qeveria duhet ta ketë parasysh”, tha Ivanov duke shfytëzuar një manifestim me rastin e 26-vjetorit të themelimit të Armatës së Maqedonisë, citon REL.
Ndërsa zëri më i munguar deri më tani për atë që zien prej ditësh në mediat e aulat politike të rajonit, është kryeministri Rama. Një ditë më parë, shkrimtari dhe publicisti kosovar Mehmet Kraja, tha se pas ideëë së ndryshimit të kufijve qëndron Rama e jo Thaçi. /tesheshi.com/
